«МАРИЙ ЭЛ» ТАЧЕ

Марий Йӱштӧ Кугыза у пӧртыш куснен

Марий Эл вуйлатыше Юрий Зайцев Шернур районышто паша дене лийышыжла, марий Йӱштӧ Кугызан илемыштыже теле озан у пӧртшым ончал савырнен.
Йомак тӱням ушештарыше Кукнур кундемысе ты илем уло Россий, тыгак йот элла гыч турист-влакын Марий кундемыш толмо ик эн йӧратыме верышкышт савырнен. Теле пагытыште тушто вич тӱжем утла еҥым вашлийыт. Резиденцийым Марий Эл Республикысе турист индустрий объект реестрышкат пуртымо.
Тений тушто Йӱштӧ Кугызалан кок пачашан у оралтым нӧлтеныт. А кӧргыштыжӧ марий калыкын йомакысе тӱҥ юзо персонажшылан, тыгак унам вашлийме пӧлемым, калыкнан ыштыш-кучышыж дене палдарыше тоштерым да тӱрлӧ мастер-классым эртараш посна лукым келыштареныт.
«Марий Йӱштӧ Кугыза пеш чын ыштен — республикнан эн йӱдвел кундемжым ойырен налын. Резиденций уна-влакым шкеж деке шупшеш, республикыште туризмым вияҥдыме пашалан полша. Ме шке велым каныме ты верым тӱзаташ полшашак тӱҥалына», – палемден регион вуйлатыше.
Юрий Зайцев Кукнур ял шотан илем вуйлатыше Леонид Долгушевлан муниципал кӱкшытыштӧ национальный политике дене кылдалтше пашам сайын ыштымыжлан Калык-влакын пашашт шотышто федерал агентствын Тауштыман серышыжым кучыктен. Тыгак «Кумылым шуктышо кож» акцийыш ушнышо Настя Элембаевалан коньким пӧлеклен да шере пӧлек дене куандарен.
«Кокланже, поснак У ий вашеш, шонымаш шукталтеш. Шонен пыштыман да тӱҥжӧ — тидлан ӱшаныман», – каласен республик вуйлатыше.
Марий Эл Республикым вуйлатышын администрацийжын информаций паша пӧлкажын уверже негызеш С.Носова ямдылен.
Д.Речкинын фотожо

Опубликовать в Одноклассники

Добавить комментарий