25 декабрьыште 14.00 шагатлан Йылмым, литературым да историйым научнын шымлыме В.М.Васильев лӱмеш марий институтышто профессор, филологий науко доктор Любовь Абукаеван «Концептосфера марийской этнической религии» монографийжын презентацийже лиеш.
Тиде монографийыште икымше гана марий этнический религийыште «юмо», «ото/кӱсото», «онапу», «кумалтыш», «перке», «шулык», «серлагыш» тӱҥ умылымаш-влакым шымлымын иктешлымашыжым савыктыме.
Книгаште тыгак кумалтыш мут, калыкмуро, миф, легенде, шӱведыме, калык мут-влакын текстыштлан анализым ыштыме. Лудшо-влаклан йӱла ден кумалтыш мут-влакым да нунын икте-весе дене кылдалтмыштым келгын умылтарыме, марий йӱлан ойыртемже дене кылдалтше йодыш-влаклан вашмутым пуымо.
Презентацийыште автор монографийым возымо историй, «Марий традиционный религий социально-гуманитарный могырым шинчымашым пуышо объект семын» фундаментальный теме кышкарыште дисциплине-влак кокласе шымлымаш лабораторийын пашаже дене палдара. Участник-влак учёный дене пырля тыгай йодыш-влаклан вашмутым кычалаш тӱҥалыт: марий-влак юмо дене кузе мутланат, мланде сай лектышым пуыжо манын, мом ыштыман да молат.
Презентацийын тӱҥ шонымашыже – книган концепцийже да тудым ямдылыме историй дене палдараш, марий шнуй текстын куатшым ончыкташ, тыгак фольклор текстым шымлыме ик эн у йӧн-шамыч нерген каласкалаш.
Вашлиймаш годым книган авторжо Любовь Абукаева участник-влаклан поэт семын творческий пашаже, тыгак туныктымо опытшо дене палдара.
15 декабрьыште учёный Москваште, Российысе калык-влакын пӧртыштышт, «Российысе марий-влак», «Москваште Марий Элын землячествыже» фонд ден организаций-влакын полшымышт дене эртаралтше Марий тиште кечын «Концепты марийской этнической религии» лекцийым эртарен.
Г.Кожевникова
Фотом соцкылыме лаштыкла гыч налме
