Йочам достойно ончен-куштымылан Марий Элыште почётан знакым пеҥгыдемдат. Марий Эл Республикым вуйлатышын обязанностьшым жаплан шуктышо Юрий Зайцев республикын Правительствыжын заседанийыштыже тидын шотышто порученийым пуэн. Тыгай темлымашым республикыште илыше-влакын йодмашышт почеш ыштыме.
«Почётан знакым учредитлыме нерген темлымашым сайлан шотлем. Ты йодышым профилян министерстве-влаклан иквереш рашемдаш кӱштем», – каласен Юрий Зайцев мутшым Марий Эл Правительствын председательжын алмаштышыже Ольга Федорова деке савыралмыж годым.
Палемден: 25 майыште Россий президент Владимир Путин Граждан-влаклан социальный полышым пуымо йодыш-влак шотышто Госсоветын Президиумжын заседанийжым эртарен, тушто йоча-влакым ончен куштышо еш-влаклан социальный пособийым тӱлымӧ нерген эл вуйлатышын Указше-влак кузе шукталт толмо нерген йодышым каҥашеныт. Тыгак тений 1 июнь гыч пашам ыштыдыме пенсионер-влакын пенсий кугытыштым, илен лекташ ситыше оксам да эн изи пашадарын кугытшым 10 процентлан кугемдаш задачым шындыме.
«Шотыш налза, почётан знак, мо нерген таче ойлена, ешыште мыняр йоча улмым ок ончо. Шуко шочшан еш але ача-ава калыклан да эллан пайдам кондышо ик икшывым ончен куштеныт – пеш кӱлешанжак огыл. Йоча сула гын, таушташ амал эре лиеш», – каласен марий Эл вуйлатышын обязанностьшым жаплан шуктышо Ю.В.Зайцев.
Л.СЕМЕНОВА
