Марий радиомеханический техникум «Профессионалитет» федеральный проектын конкурс отборыштыжо сеҥышыш лектын: 2024 ийыште тушто радиоэлектронике областьыште кӱкшӧ технологиян производствылан пашаеҥ-влакым ямдылыше тунемме-производство кластерым ышташ палемдыме.
«Профессионалитет» – Россий просвещений министерствын тӱҥалтышыж почеш илышыш пурталтше моткочак кӱлешан проект. Тудо кыдалаш профессионал образований системым уэмден вияндаш виктаралтын. Тудын почеш Марий радиомеханический техникумышто «Радиоэлектронике – РМТ» инноваций рӱдерым почаш палемдыме. Ме тушто йӧршеш вес кӱкшытан специалист-шамычым ямдылаш тӱҥалына, варажым нунылан проектын парнёржылан шотлалтше предприятийлаште паша вер ямде лиеш», – каласен Марий Эл образований да науко министр Лариса Ревуцкая.
Партнёр-влак радамыште улыт: «Марий машиностроительный завод», «Полупроводник прибор завод», «Копир» завод», «Волжскысо электромеханический завод», «Потенциал», «Инструмент-Н», «Технотех», «Автограф», «Ростелеком» предприятий ден организаций-влак, тыгак Россий телевидений да радивещаний сетьын Марий Элысе филиалже, Йошкар-Оласе технологический ден индустрий да предпринимательстве колледж-влак, Марий политехнический ден Волжскысо индустриально-технологический техникум-шамыч.
Программым илышыш пурташ Марий радиомеханический техникумлан федерал бюджет гыч 100 миллион теҥге ойыралтеш, республикын бюджетше гыч – 15 миллион, экономикын реальный секторышкыжо пурышо партнёр-влак деч — 12 миллион 800 тӱжем теҥге окса ден оборудований. Тиде средствам кластерым ышташ пӧлем-шамычым уэмден олмыкташ, материально-технический базым вияҥдаш кучылташ палемдыме.
Г.Кожевникова
Фотом техникумын сайтше гыч налме
