Марий Элым вуйлатыше Юрий Зайцев школыш икымше гана каяш ямдылалтше йоча-влак – СВО-н участникше-шамычын икшывышт – дене вашлийын.
Г.Константинов лӱмеш Руш академический драме театрыште эртыше вашлиймаште тудо ӱдыр-рвезе-влаклан кажныжлан пӧлек наборым кучыктен.
«Шергакан йоча-влак, пагалыме ача-ава-шамыч! Шинчымаш кече, школышто тунемаш тӱҥалме дене саламлем. Школыш пуртышо омса изи, но кугу илышыш ошкыл. Лач тӱҥалтыш школ йочалан мо тудлан келшымым умылаш йӧным ышта, тудын талантшым почеш. Ты шотышто, мутат уке, тудлан ача-ава-влак полшат. Ачада-влак чынжымак герой улыт, Шочмо элнам аралат. Нунын гай виян, лӱддымӧ, патыр гай дене кугешнен кертыда», – каласен Юрий Зайцев.
Марий Эл вуйлатышын кидше гыч тунеммаште пайдаланыме пӧлек наборым 300 наре икшыве налын. Тидлан республикын бюджетше гыч 537 тӱжем теҥгем ойырымо.
Тыгай мероприятий – Шинчымаш кече дене саламлымаш веле огыл, тиде тыныс илышна верч кредалше-влакын ешыштлан полыш.
Марий Элым вуйлатышын пресс-службыжын уверже негызеш Галина Кожевникова ямдылен
Фотом Марий Эл вуйлатышын пресс-службыж деч налме
