Марий Эл вуйлатыше Ю.Зайцев Куба, Вьетнам, Беларусь, Турций Казахстан, Венесула, Армений гыч журналист-шамыч дене вашлийын. Нуно кундемышкына пресс-тур почеш толыныт.
Юрий Зайцев журналист-влаклан Марий Эл нерген каласкален, тыгодым экономике, тӱвыра, туризм могырым кылым ыштыме шотышто мутланен.
Вашлиймаште республикым вуйлатыше Марий Элым уло чонжо дене йӧратен шындымыже, тудын дене кажне кечын утларак да утларак кугешнымыж нерген каласен.
Республикышкына Российын чыла регионжо да лишыл йот элла гыч турист-влак шукын толыт, палемден Ю.Зайцев. Нуным кундемнан пӱртӱсшӧ, рӱдоланан архитектуржо, Шереметев замок сымыстарат. 2023 ийыште Марий Элым миллион утла турист ончал савырнен.
Тений Козьмодемьянскыште причалым почыныт. Тушко ончыкыжым идалык мучко 300 пассажир ден круиз судно-влак шогалын кертыт. Тылеч посна Йошкар-Оласе аэропортын у пассажир терминалжым чоҥат. Унагудо сфер писын вияҥеш.
Тӱвыра аланыште республикын сеҥымашыжым Российыште веле огыл, вес эллаштат ончыктымо. Марий Элын тӱвыра учрежденийже-влак Беларусь, Казахстан, Таджикистан, Китай дене пеҥгыде кылым кучат.
Юрий Зайцев производствышто да ялозанлыкыште республикнан кугу куатан улмыжым палемден. 2023 ийыште Марий Эл 61 эл дене ужалыме-налме да экономике могырым кылым ыштен.
Пресс-тур регионыштына 9-12 августышто эртаралтын да Йошкар-Олан 440 ияш лӱмгечыжлан да Регион-влак кокласе «Йошка Еш» II гастрономический фестивальлан пӧлеклалтын. Йот элла гыч журналист-шамыч Йошкар-Олан мотор верлажым ончен коштыныт, Юрино посёлкышто Шереметев замокышто, Козьмодемьянск олан тоштерлаштыже, Морко районышто Унчо этнотӱвыра комплексыште лийыныт.
Марий Эл вуйлатышын пресс-службыжын уверже негызеш Л.ШАБДАРОВА ямдылен
Д. Речкинын фотожо/Марий Эл вуйлатышын пресс-службыжо
