Марий Элна – «Российын тӱрлымӧ картыштыже»
Тиде карте Российысе калык-влакын тӱвыра поянлыкышт идалыклан пӧлеклалтын. Россий Федерацийын кажне регионыштыжо эн сай кидмастар-влак шке субъектысе кумдыкшын фрагментшым тӱрленыт, да тиде картыш пуртат.
Картын размерже 3 метр кӱкшытан да х 6,71метр лопкытан. Ты пашам Звенигово Калык кидмастар пӧртын тӱрлызыжӧ-влакын студийын кидмастарже-влак проект вуйлатыше, Марий Эл тӱвыран сулло пашаеҥже Надежда Майкова да самырык тӱрлызӧ Людмила Ефремова тӱрленыт, а увер шотышто полышым Ирина Чугунова ыштен.
– Марий Элын контуржым ышташ ятыр шоненна, а эскизым ышташ Марий Элын гербыштыже улшо маска полшен, – палемдыш Надежда Майкова. – Ужыда, картын фрагментше маскам ушештара. Тыгак марий йӱла почеш кучылтмо тамгам – кайыклудым – налме. А молан, шонеда? Финн-угор калыкын легендыж почеш сандалыкыште илыш лудо гыч тӱҥалеш. Тидыже Марий кундемлан келшыше символлан шотлалтеш. Сандене мемнан тӱрлымӧ пашана кайык йыр пӧрдеш. Ты кечылаште ме ты пашам мучашленна да тудым Шупашкар олашке колтена. А картын презентацийже 12 июньышто «Российын мурыжо» фестиваль-марафон годым лийшаш. Тӱрлымӧ картым Россий Федерацийыш пурышо моло федерал округлаштат ончыкташ тӱҥалыт.
М.Скобелев
Звенигово калык кидмастар пӧртын фотожо
Снимкыште: 1– Кидмастар-влак: И.Чугунова, Н.Майкова, Л.Ефремова
