Нижний Новгородышто событийный туризм сферыште Russian Event Awards XIV тӱнямбал премийын финалже эртен.
Тушо Марий Эл гыч темлыме проект-шамычат палемдалтыныт. Мутлан, «100 тӱжем гыч 1 миллион еҥ марте илыман населенный пунктышто гастрономий туризм областьыште эн сай событий» номинацийыште республикыште эртарыме регион-влак кокласе «Йошка Еш» III гастрономий фестиваль 3-шо верым сеҥен налын.
«100 тӱжем наре еҥ илыман ола-влак коклаште тӱвыра да сымыктыш областьыште эн сай турист событий» номинацийыште Козьмодемьянскыште эртаралтше «Васюки Фест» мыскара да койдарчык фестиваль 2-шо вер дене палемдалтын.
Козьмодемьянск тоштер комплексын эртарыме «Шанавыл – шым пеледыш, шым ното» йоча этнический фестивальже «Эн сай турист событий» номинацийыште кумшо верыш лектын.
Тыгак посна диплом-влак дене Марий Элын Йӱдвел коштмаш Федерацийже йӱдвел коштмаш да куржталмаш фестивальым, Йошкар-Оласе тӱвыра да каныме парк Кугу Сеҥымашлан пӧлеклалтше спектакль-квестым да Козьмодемьянск оласе округ туризм областьыште деловой программым эртарымыштлан посна номинацийлаште палемдалтыныт.
Фотом «Туризм в Республике Марий Эл» воткыл лаштык гыч налме.
