Эртыше ий декабрьыште Москваште «Пашан айдемыже» Общероссийский мер толкынын икымше учредительный съездше эртен. Тушто россий регионлаште ойыртемалтше ончыл пашаеҥ-влакым палемденыт. Нунын коклашке Марий Эл гычат кум еҥ логалын.
Шуко ий пашам тыршен ыштымылан да шке сферыште сеҥымашке шумылан «Единый Россий» партий деч «Пашан айдемыже» сертификат дене палемдалтыныт:
Юрий Ерпулев – «Йошкар-Оласе ТЭЦ-1» АО-н 1-ше №-ан котельный цехшын котельный оборудованийын кугурак машинистше. Юрий Михайловичын чумыр паша стажше 40 утла ийыш погына, тышечын 35 ийжым тудо «Йошкар-Оласе ТЭЦ-1» акционер обществылан пӧлеклен;
Николай Иванов – «Полупроводник прибор завод» АО-н 6-шо разрядан слесарь-ремонтникше. Тудо заводышто 20 ий пашам ышта;
Мария Коржавина – «Искусственный коваште завод» АО-н генеральный директоржын производство шотышто алмаштышыже. Мария Юрьевнан заводысо паша стажше –18 ий утла.
Палемдыман, «Пашан айдемыже» толкынын учредительный съездше паша йӱлам пеҥгыдемдымашке да пашаеҥ-шамычлан сай йӧным ыштымашке виктаралтше кӱлешан ошкыл лийын.
Маргарита ИВАНОВА
Марий Эл Паша да социальный аралымаш министерствын фотожо