4-9 июльышто Нижний Новгород областьыште Юл кундем федерал округын «Метеор» окружной форумжо эртен. Тушто Марий Элнан чапшым 60 утла еҥан делегаций арален.
Форумышто ӱдыр-рвезе-влаклан 7 направлений почеш лекций ден мастер-класс-шамыч эртеныт. Тиде – волонтёрство, медиа, науко да технологий, бизнес, креатив индустрий, Икымше-влакын толкынышт, молодёжь рӱдерым вуйлатыше-влак.
Тунемме программе деч посна тӱвыра программат оҥай лийын. Участник-влаклан вургемым чиялтыме, интерактивный арт-объектым ыштыме мастер-класс-шамыч лийыныт, тыгак тӱрлӧ конкурс эртен.
Марий Эл гыч участник-влак чыла вере чолгалыкым ончыктеныт да республикнан чапшым кӱшнӧ кученыт. Самырык художник-шамычын конкурсыштышт 1-ше вер дене Ульяна Лебедева палемдалтын. Поэзий да прозын авторжо-влакын конкурсыштат мемнан-шамыч ончылно лийыныт: «прозо» номинацийыште 1-ше верым Кристина Архипова налын, а «Поэзийыште» – Алёна Сабанцева.
Форумышто молодёжь театр-влакын коллективыштын фестивальышт лийын. Тушто Марий самырык театрын командыже 3-шо верым налын. Тыгаяк вер дене киберспортышто Олег Кутергин палемдалтын. «Медиа» направлений дене кадр-влак конкурсын финалистше Иван Христолюбов лийын.
Форум Юл кундем федеральный округ Российын нылле утла регионжо гыч 1000 утла ӱдыр-рвезым иквереш чумырен.
Г.Кожевникова
Фотом Марий Эл Образований да науко министерствын сайтше гыч налме
