Марий Эл вуйлатыше Юрий Зайцев Федеральный Собраний делегацийын радамыштыже Пекиныш каен, тушто Китай Калык Республикын калык представитель-влакын Всекитайский собранийыштын Постоянный комитетшын председательже Чжао Лэцзи дене вашлиймаш лийын.
Делегацийым Россий парламентын кӱшыл палатыжын председательже Валентина Матвиенко вуйлатен. Тудо ӱжмашлан тауштен да ончыкылык план нерген ойлен, тыгодым Россий ден Китай коклаште шукертсек пеҥгыде кыл улмым палемден.
«Россий ден Китай коклаште чыла могырымат авалтыше стратегический партнёр семын келшымаш шкенжын эртыме корныштыжо эн кугу кӱкшытыш шуын да, тӱнямбалне каен шогышо пуламырым ончыде, койынак умбакыже вияҥеш», – каласен Валентина Матвиенко.
Келшен илыше кок эл коклаште политический, экономический вашкыл келгемеш да кумдаҥеш, тӱнямбал ареныште вашкыл пеҥгыдемеш, палемден Чжао Лэцзи.
Совет Федерацийын спикерже пашам келшен ыштымым кумдаҥдымаште Российысе регион-влак да КНР-ын провинцийже-влак коклаште вашкыл вияҥмым ик эн ӱшанле йӧн манын каласен.
Совет Федераций председательын алмаштышыже Константин Косачев палемден: делегаций радамыште Российысе 3 субъектын представительже-влак улыт, нунын коклаште Марий Эл Республикым вуйлатыше, тидыже экономикын тӱрлӧ сферыштыже регионын кугу куатшым ончыкташ йӧным пуа.
Корныш тарваныме деч ончыч Юрий Зайцев Китайыш могай задаче да план дене кайымыж шотышто шонымашыжым каласен, тидын годым палемден: икмыняр ий жапыште торговльо да экономике, науко да технике, гуманитарный сферылаште Марий Эл ден икмыняр провинций коклаште вашкылым кызыт мартеат ыштыме, КНР рнспубликын ӱшанле партнёржо лийын да улеш. Китай Российын ӱшанле да ончыкыжымат ӱшаным пуышо внешнеторговый партнёржылан шотлалтеш, сандене ончыкыжым моло провинцийла денат кылым вияҥдаш шонымаш уло, ешарен Марий Эл вуйлатыше.
Марий Эл Республикым вуйлатышын администрацийжын информаций паша шотышто пӧлкан уверже негызеш Л.СЕМЕНОВА ямдылен
