15 июньышто Санкт-Петербургышто Марий Элым вуйлатыше Юрий Зайцев ден Россий Федерацийын спорт министрже Олег Матыцин республикыштына спортсмен-влакым кӱкшӧ сеҥымашлан ямдылаш полшышо инфраструктурым пырля вияҥдаш кутырен келшеныт.
Вуйлатыше-влак регионыштына капкыл культур ден спортым вияҥдыме, физкультур-тазалыкым пеҥгыдемдыме комплекслам уэмден олмыктымо да чоҥымо йодышлам онченыт. «Демографий» национальный проектын «Спорт – илышын нормыжо» федеральный проектшым илышыш пуртымо кышкарыште Марий Эл правительстве ден РФ Спорт министерстве коклаште пашам пырля ыштыме нерген келшыкыш кидпалыштым пыштеныт.
Тиде келшык республикысе чыла еҥлан физкультур да спорт дене заниматлалташ, спорт инфраструктурым модернизироватлаш, объект-шамычын материально-технический базыштым саемдаш, регионыштына физкультур да спорт мероприятийлам утларак эртараш, профессионал спортсмен-влакым ядылыше кадрым кумылаҥден кондаш йӧным ышта. Тыгак самырык-влаклан шкем ончыкташ, спортышто кугу кӱкшытыш шуаш, элнан сборный командылашкыже логалаш йӧн лиеш.
Ю.Зайцев Шернур районышто 2012 ийыштак чоҥаш чарныме спорт объектым чоҥен пытарыме йодышым тарватен. Тудо 40 процентлан ямде. Российын Спорт министерствышкыже чоҥымо пашам федеральный бюджет гыч ойырымо окса дене пырля мучаш марте шуктымо шотышто документым колтымо.
Регионым вуйлатыше Ю.Зайцев Олег Матыцинлан республикын россий кӱкшытысӧ спорт сеҥымашыж нерген каласкален, тыгодым Марий Элыште шуко уста спортсменын илымыжымат палемден.
«Марий Эллан спорт да физкультур йодышла шотышто полшымыланда тауштем. Рӱдолаште да районлаште кызытсе жаплан келшыше физкультур-тазалыкым пеҥгыдемдыме объект-шамычым чоҥымо. Чыла тидым элым вуйлатыше Владимир Владимирович Путинын тӱҥалтышыж дене регионлаште илышыш пурталтше национальный проект кӱшеш ыштыме. Россий Федерацийын Спорт министерствыж дене ыштыме келшык шуко сай шонымашнам илышыш пурташ йӧным ышта. Спортсменлан тренироватлалташыже келшыше йӧн, профессиональный тренер-влак да таҥасыме шотышто кугу опыт кӱлыт. А республикыштына илыше калыкын кӧргӧ вийже, спортышто сеҥымашке шуаш да чемпион лияш кумылжо моткоч кугу», – манын Ю.Зайцев.
Спорт министр О.Матыцин Марий Элым верланымыже да инфраструктур объектлаж дене ӱшаным пуышо регион семын палемден.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
