Марий Элыште вӱд поянлыкым вияҥден толмо шотышто паша планым ыштыме.
Кодшо кечылаште Марий Эл правительстве председательын икымше алмаштышыже Дмитрий Троицкий Росводресурсын Верхне-Волжский бассейн вӱд управленийжын вуйлатышыже Александр Гриднев дене вашлийын. Нуно вӱд поянлыкым вияҥдыме тӱҥ направлений-влак да вӱдын кундемналан ыштыме эҥгек деч аралалтме паша нерген каҥашеныт.
Марий Эл правительстве Росводресурс да тудын территориальный управленийже дене вӱдым пайдалын кучылтмо, вӱд объект-влакым аралыме да вӱдшор лийын кертме лӱдыкшым кораҥдыме шотышто пеҥгыде кылым куча.
Тенийлан да 2027-2028 ийлан ятыр кугу мероприятийым эртараш палемдыме. Мутлан, Изи Какшан эҥерын йогын корныжым тергат, Туньинка ден Сукма эҥерлаште гидротехнический сооружений-влакым капитально олмыктат. Республикысе икмыняр районышто изирак вӱд объект-влакын аралыме кумдыкыштын чекыштым рашемден шуктышаш улыт.
2002-2005 ийлаште республикыште 86 гидротехнический сооруженийым олмыктымо. Федерал субвенций кӱшеш эҥер серысе, аралыме зоно ден сер воктенысе защитный полоса-влакын линийыштым 14 тӱжем километр кумдыкышто рашемдыме.
Поснак кугу тӱткыш Изи Какшанын Йошкар-Ола кумдыкысо йогынжым йошкын ден йӧрлшӧ пушеҥге-влак деч эрыктыме пашалан ойыралтын. Лавыргымылан кӧра эҥерлан ышталт кертше эҥгекын роскотшо 300 миллион теҥгеш шуын кертын, эҥер пундаш гыч 335 тӱжем кубометр торым эрыктен лукмо.
«Ойыртемалтше вӱд объект-влакым аралымаш» федерал проект почеш 2023-2024 ийлаште тыгак Оршанке районышто йогышо Ошла эҥерын пундашыжым эрыктыме.
Марий Эл вуйлатышын пресс-службыжын уверже негызеш Светлана Носова ямдылен.
