Йошкар-Оласе 29-ше №-ан «Ший оҥгыр» йочасадыш коштшо Амира Матвееван всероссийский конкурсышто С.Чавайнын «Изи мӱкш» почеламутым сылнын йоҥгалтарымыж дене лауреат лӱмым сеҥен налмыж нерген газетыштына возенна ыле.
Кодшо кечылаште сеҥыше-влаклан Москошто дипломым, статуэтке ден пӧлекым кучыктеныт. Тушко Амира аваж дене пырля миен.
– Элнан рӱдолашкыже поезд дене кудалынна. Амиралан окна гыч шыже пӱртӱсым ончаш пеш келшен. «Измайлово» унагудыш вераҥмеке, йоча-влаклан мастер-классым эртареныт, поснак Российын тӱрлӧ регионыштыжо илыше калык-влакын модышышт оҥай лийын, – палдара аваже. – Пӧлеклан ӱдырна моткоч куанен.
«Курымла дене йоҥгалт, шочмо йылме!» смотр-конкурс «Калыкнан тукым гыч тукымыш куснен толшо шерге поянлыкше – мый йӧратем мемнан мотор йылмынам» форум жапыште эртен. Конкурсыш Российын ятыр регионжо гыч йоча-влак ушненыт.
– Ты гана сценыште мастарлыкым ончыктымыж годым Амира изиш тургыжланыш, – ешарыш Лира Матвеева. – Но моло икшыве-влак почеш тудат почеламутым лудо. Жюрилан марий тувыр да шочмо йылмына дене почеламутым сылнын йоҥгалтарымыже келшен. Кас велеш Моско олам ончен савырнышна. Ӱдырна элнан рӱдолаштыже икымше гана лийын, садлан тудлан чылажат оҥайын чучын.
Алевтина БАЙКОВА
Фотом еш альбом гыч налме
