«Оласе йырвелым йӧнаным ыштымаш» федерал программе почеш марий рӱдолаштына калык тӱшкан коштмо кумдыклам тӱзатат. 24 проектым онлайн-йӱклымашке лукмо. Иктыже – Мари парк. Тудым тӱзаташ темлымаш дене Мер Каҥаш лектын ыле…
Йӱклымаш 15 апрельыште тӱҥалын да 30 май марте шуйна. Мари парклан лийын шуаш Российын тӱрлӧ кундемыштыже илыше марий-шамычат йӱкым пуэн да тидын дене полшен кертыт. Мер Каҥашын еҥже-влакын палемдымышт почеш, ты парк Келшымаш парк семын лийшаш. Тушто марий еҥын кумылжым нӧлтен кертше тӱрлӧ лук лиеш, пайремым эртараш, калыкнан тӱвыраже, йӱлаже, кочкыш-сийже, вургемже дене палдараш йӧн ышталтеш. Икманаш, марий-влакым веле огыл ушышо вер лиеш.
Мыняр шуко йӱкым погена, тунарлан шонымашке лишкырак лийына. Эшежым йӱклымашке Российын кажне гражданинже, кеч-могай регионышто илыше, кеч-могай вес калык гыч лекше 14 ияш деч кугурак ийготан ушнен кертеш. Тидыжат мыланна утларак йӱкым погаш полшышаш.
Йуклаш https://12.gorodsreda.ru сайтыш пурыман. Тыгай корно дене кайыман: / Принять участие /проголосовать /Регион: Марий Эл/ Муниципальное образование: Йошкар-Ола/ 2 страница: Мари парк по Ленинскому проспекту / проголосовать. «Госуслуги» кугыжаныш портал гочат йӱклаш йӧн уло.
Мер Каҥаш вуйлатыше, Оньыжа Эдуард Александровын ӱжмашыжым ушештарыме шуэш:
– Марий-влак, таче ме тыгай поро корнышко шуынна, ола администраций мыланна моткоч кугу тӱткышым ойыра. Мемнан вийнам, пырля лийын моштымынам кучылтын, Мари паркым чоҥаш да тудым ик кугу чапле верым ыштыме пашалан мелын шога. Сандене кӱлеш наре йӱкым погышашак улына. Сеҥен кертына гын, бюджет гыч оксамат налаш корно почылтеш. Мари паркым почын, ме ончыкылык тукымлан сай шарнымашым, уныка-влаклан сай пӧлекым ыштен кодена.
Ушештараш уто огыл, «Оласе йырвелым йӧнаным ыштымаш» программе почеш кодшо ийын рӱдолан 9-ше микрорайоныштыжо марий просветитель П.П.Глезденев лӱмеш саклымверым почмо.
С.Носова
