22-23 августышто Кукнурышто Мари Йӱштӧ Кугызан илемыштыже Шернур районын самырык тукымжын «Энергия будущего» форумжо эрта.Тушко 60 утла ӱдыр-рвезе чумырген.
Мероприятийын программыже моткоч поян. Тушто икмыняр туныктымо площадке-влак улыт, тыгак шке моштымашым мастер-класслаште ончыкташ лиеш.
Форумым почмо кечын Шернур муниципальный районын администрацийжым вуйлатыше Александр Кугергин самырык-влакын политикышт шотышто форумыш погынышо-шамыч дене мутланен.
«Росмолодежь. Гранты» площадкыште Ким Васин лӱмеш Шернур рӱдӧ книгагудын директоржо Ирина Кошкина да книгагудын пашаеҥже Анастасия Бастракова самырык тукымлан грантым возаш туныктеныт. Ирина Григорьевна ден Анастасия Витальевна Марий Элын Самырык-влакын политикышт шотышто комитетын эртарыме конкурсыштыжо грантым сеҥеныт.
Фотом Шернур рӱдӧ книгагудын соцкыл лаштыкышт гыч налме
