Мӱндыр ялыште, мотор верыште
Тачысе унана – Марий Турек районысо Памашъялын кидмастарже Илья Платунов.
Тиде ялыште у да сылне оралте шагал огыл. Урем дене эртыме годым, нуным ончен, кумыл нӧлталтеш. Теве – Станислав Петровын пӧртшӧ, а тиде чапле суртшо – Алексей Афанасьевын… А Илья Дмитриевичын кече гай тӱсан, мотор окнасерган, чатка изигапкан оралтыже ял мучаште верланен да умбачынак волгалтеш, пуйто «кидмастар тыште ила» маннеже. Суртозан кидше пийын «пӧртшымат» монден огыл – тудымат сылнын «тӱрлен» шындыме.
Илья Дмитриевич мемнам порын вашлие да суртшо ден пакчажым кумылын ончыктыш. Теве ме тудын дене мастерскойышкыжо пурышна. Пырдыжыште ӱзгар-влакым чаткан вераҥдыме, марий тӱрын шаблон коеш. Шке жапыштыже суртоза «Восход» совхозышто плотник бригадым вуйлатен. Лач тунамак тудлан Памашъялыште илашыже пачерым пуэныт улмаш.
Арбор велыште Илья Платунов ятыр суртым ыштен. Калыкын йодмыж почеш монча коҥгамат шагал огыл оптен. Мутат уке, тудыжым шканжат ыштен. Кугезе кочаже Фёдор Иванов тале кидмастар, плотник, чоҥышо семын чапланен. Памашъялыш пурымаште тудын кидше дене чоҥымо оралте кызыт мартеат аралалт кодын.
Ме суртыш пурышна. Илья Дмитриевич верысе «ботаник» Моисей Николаевич Осиповлан таушта. Тудын деч кандаш ий ончыч налме виноградше 60 килограмм саскам пуэн.
Суртоза тыгак шке кид дене ыштыме пӱкеным, юмоҥам, каныме верым, мастерскойжым ончыктыш. Мастерскойыштыжо ятыр станок уло, шуруповёртым электровоштыр дене аккумуляторыш ушымо – тыге пашам ышташ куштылгырак. Кумло ик ий ончыч Илья Дмитриевич инвалидыш савырнен, но вуйым сакен огыл: перестройко жапыште пидаш, вургемым ургаш тунемын. Ургымо машинаш электродвигательым келыштарен да ургаш тӱҥалын, а варажым ешыже тудлан электропрялкым пӧлеклен. Кидмастар калыклан латкок шӱртым шӱдыраш йӧршӧ станокым поген пеш йӧнан. Илья Дмитриевич кузе пашам ыштымыжым тыманмеш ончыктыш. Йоча-влак нергенат ок мондо: нунылан фанер оҥа гыч модыш автомашинам келыштарен пуэн. А кызыт кидмастар суртыштыжо отделке пашам шукта. Ойлымыж почеш, оралтым латкок ий ончыч чоҥымо, тудым пӧръеҥ эре уэмденак толеш.
– Яра шинчаш жап уке. Паша тыйым шкеак муэш, – кидмастар шыргыжал каласыш.
М.Скобелев
Авторын фотожо
