Параньга район Элнет кундемыште 7 июльышто Мӱкш кумалтыш лиеш.
Кодшо ийын тыгай кумалтышым эртараш Элнет почиҥга ялыште лӱмын отым почыныт. Тидым ышташ тусо чолга еҥ, мӱкшызӧ Алексей Кислицын темлен. Ял калык ойжым сайлан шотлен. Кумалме вержымат амал деч посна ойырен налын огытыл. Тушто таче мартеат мӱкш илыман кӧргашан пушеҥге-влак аралалт кодыныт. Ожнысо йӱла почеш мӱйым кӱзышӧ-влакат уке огытыл. Иктыже – А.Кислицын шкежак. Онаеҥ-влак кумалаш онапулан мотор пӱнчым ойырен налыныт. Ойлат, икымше кумалтышым эртарыме деч вара тыгай пушеҥгылаш мӱкшыжат илаш толын пурен.
7 июльышто эртышашлык кумалтышыш республикысе районла гычат чыла кумылан-влакым вучат. Мӱкшызӧ-влаклан шкешотан семинарымат эртарат. Ончыкыжым ты верыштак икшыве-шамычлан паркым ышташ шонат. Онаеҥ-влакын ойлымышт почеш, Мӱкш кумалтыш кажне ийын эртаралташ тӱҥалеш.
Тенийысышкыже Пошкырт вел гычат уна-шамычым вучат. Туштат тыгай кӧргашан пушеҥгылаште мӱкшым ончышо 120 наре еҥ уло манын ойлат.
С.Носова
