Марий Эл вуйлатыше Юрий Зайцев Россий Федерацийын Рӱдӧ сайлымаш комиссийжын председательже Элла Памфилова дене вашлийын. Нуно республикыште Кугыжаныш Погыныш да муниципал парламентлашке депутат-влакым сайлымашым эртарыме дене кылдалтше йодыш-влакым каҥашеныт. Сайлымаш тений сентябрьыште лиеш.
Юрий Зайцев йӱклымӧ годым нимогай нарушений лийшаш огыл манын палемден.
– Сайлымашлан эре кугу тӱткыш ойыралтеш, да ситыдымаш-влак тӱрлӧ шоя увер (фейк) лекмылан амалым ыштат. Еҥ-шамыч сайлымаш процесслан ӱшанышаш улыт. Нуно иктешлымаш шотышто кокытеланышаш огытыл. Тиде моткоч кӱлешан, – ойлен Юрий Зайцев.
Элла Памфилова Марий Элыште Россий Федерацийын президентшым сайлымашым кугу кӱкшытыштӧ эртарымым палемден. Тӱрлӧ нарушений ден экшык-влак лийын огытыл. Участкылаште еҥ-влаклан лӱдыкшыдымӧ лийже манын эскереныт, бюллетень-влакым аралаш келшыше условий ышталтын.
Тиде вашлиймаште ойленыт: Марий Элыште сентябрьыште икымше гана дистанционный электронный йӱклымаш йӧн пурталтеш. Тыге республикыште илыше-влак мӧҥгышт гыч лекде йӱклен кертыт.
Марий Эл вуйлатышын пресс-службыжын уверже негызеш Л.Камалетдинова ямдылен
