Марий Элым вуйлатыше Юрий Зайцев Йошкар-Оласе «Сосновая роща» интернат-пӧртым ончен савырнен.
«Демографий» национальный проектын кышкарыштыже уэмден олмыктымо деч вара тиде тӧнеж кызытсе жаплан келшыше да илалше еҥ ден инвалид-шамычлан палынак йӧнан лийын.
2023-2024 ийлаште зданийым уэмден олмыкташ чылаже 201,5 миллион теҥгем ойырымо: 197,5 миллион теҥгем – федерал бюджет гыч, 4 миллион теҥгем – республик бюджет гыч.
Интернат-пӧртын тӱжвал тӱсшым тӱрыснек уэмдыме, илыме пӧлемлаште окна ден омсам вашталтыме, помещенийын кӧргыжым чиялтыме, инженер сетьлам олмыктымо, у лифтым шындыме. Тылеч посна илыме пӧлемлашке кызытсе мебельым, тыгак кухньыш да моло вере оборудованийым налме.
Холлышто яра жапым пайдалын эртараш да каналташ икмыняр кумдыкым келыштарыме. Ынде кумылан-шамыч бильярд да шахмат дене модын, караоке почеш мурен, аквариумышто ийын коштшо колым камин воктек вераҥдыме пушкыдо креслыш шинчын ончен, изирак кафеште чайым да мойн йӱын кертыт.
Икымше пачашыште психологын кабинетше, галокамер, физкабинет, эмлыше физкультур зал да усталык мастерской улыт.
Юрий Зайцев социальный услугым налше-влакын пӧлемыштым, кочмыверым ончен да интернатыште илыше-шамыч дене вашлийын мутланен.
«Сосновая роща» интернат-пӧртым уэмден олмыктымо дене кугурак тукымлан йӧнан илыме верым ыштыме, палемден республикым вуйлатыше. Мутшо почеш, тыште мӧҥгыштӧ илыме гай чучшаш.
Юрий Зайцев тылын труженикше-влак Валентина Царегородцевалан, Нина Мельниковалан да Антонина Фофоновалан посна тӱткышым ойырен. Сеҥымашке надырым пыштымыштлан пагалымым да тауштымым ончыктымо шот дене кажныжлан «1941-1945 ийласе Кугу Отечественный сарыште сеҥымылан – 80 ий» юбилейный медальым кучыктен.
«Ме эн ончычак тендан кузе илымыдам ончалаш толынна. Тений элнан фашист Германийым сеҥымыжлан 80 ий теммым палемдаш тӱҥалына. Палем, тендан кокла гыч кажныже пашан ветеранже, элнам да шочмо кундемнам нӧлтымашке шуко вийым пыштыше айдеме улыда. Мый тыланда кугу Сеҥымашлан 80 ий темме лӱмеш медальым кучыктынем. Кызыт тиде поснак кӱлешан. Фашист мемнам 80 ий гычат темдалнеже, но ме тиде ганат сеҥена. Правительстве да шке лӱмем дене тыланда пеҥгыде тазалыкым тыланем», – манын Марий Элым вуйлатыше.
Йошкар-Оласе «Сосновая роща» интернат-пӧртыштӧ 160 вер уло. Тудо сарын участникше ден инвалидше, пашан ветеранже, тылын труженикше, тыгак моло илалше еҥ ден инвалид-шамычлан палемдалтын. Кызыт тыште 86 еҥ ила, витлыже – милосердий отделенийыште.
Марий Элым вуйлатышын пресс-службыжын уверже негызеш Маргарита ИВАНОВА ямдылен
