Марий Элым вуйлатыше Юрий Зайцев Йошкар-Оласе «Пӱнчер ото» интернат-пӧртым уэмден олмыктымо пашам аклен
Илалше еҥ ден инвалид-влаклан почмо «Пӱнчер ото» социальный комплексым «Демографий» национальный проектын «Кугурак тукым» федеральный проектшым илышыш пуртымо кышкарыште уэмдаш йӧн лектын.
Чоҥымо пашам эртыше ий шошым тӱҥалме, тидлан федеральный бюджет гыч 200 миллион утла теҥгем ойырымо.
Интернат-пӧртым олмыктен шуктымо пашам республик вуйлатыше шке контрольышкыжо налын.
Ю.Зайцев объектыште шуктымо пашам ончен савырнен да интернатыште илыше-влаклан мӧҥгысӧ гай йӧнан условийым ыштымым палемден.
Корпус-влакым черет дене уэмден олмыктат, тыгодым тӧнеж ончычсо семынак пашам ышта. Таче кечылан малыме блок, кочмывер да каныме кумдык ямде улыт, паша административно-озанлык да медицине блоклаште палемдыме радам дене шукталтеш.
Интернат-пӧртыштӧ илыше-влак республикым вуйлатышылан тӱткышым ойырымыжлан да тӧнежыште ыштыме сай условийлан тауштат.
Йошкар-Оласе «Пӱнчер ото» интернат-пӧрт 160 илалше еҥ ден инвалидлан палемдалтын. Тыште медицине, социально-психологический, озанлык службо-влак, паша дене эмлалтме шотышто инструктор улыт. Шкем шке ончен кертдыме-шамычлан «Милосердий» отделений пашам ышта. Тӧнежыште кочмыверым, актовый залым, библиотекым, ургымо мастерскойым, психикым эмлыме пӧлемым да медицине кабинетлам оборудоватлыме.
Марий Элым вуйлатышын пресс-службыжын уверже негызеш М.ИВАНОВА ямдылен