6 мартыште, М.Шкетан лӱмеш Марий национальный драме театрыште «Сандалык йӧратымаш» спектакльын премьерже лиеш.
Тудым сценыш лукмаште театрын тӱҥ режиссёржо Роман Алексеев тырша.
Спектакль ончышо-влаклан чылтшак у огыл. Тудым вич ий ончыч «Маринавт-влак але Теве кушто илышет!» лӱм дене сценыш луктыныт ыле, но икмыняр гана ончыктымеке, репертуар гыч кораҥдалте. А ындыжым режиссёр уэш тудын деке пӧртылын: спектакльым уэмден, лӱмжым вашталтен калыклан ончаш темла.
– Тачысе илышым шотыш налаш гын, спектакль эшеат оҥайрак лийшаш, вет илышыш койын нейросеть пура, цифровой технологий моткочак вияҥеш. Постановкышто айдеме, илыш, чоншижмаш нерген шонкалымаш тӱҥ верым айла, – республикысе журналист, блогер-влаклан эртарыме пресс-конференцийыште палдарыш Роман Алексеев.
Космонавтике нерген утларак пален налаш, артист-влаклан образыш келгынрак пураш да рольым ӱшанлын чоҥаш манын, театрын усталык коллективше шукерте огыл Чуваш Республикын рӱдолаже воктенысе Шоршелы селаш, СССР-ын лётчик-космонавтше Андриян Николаевын мемориальный комплексышкыже миен коштын. Нунын дене пырля мыламат каяш пиал шыргыжале.
Чуваш Республикыште чылаже кум космонавт шочын-кушкын. Нунын кокла гыч икымшыже – Андриян Николаев. Тудо космосышто кум сутка лийын. Космонавтике тоштерын экскурсоводшын каласкалымыж почеш, чуваш калык пагалыме эргыжым кызытат сайын шарна да тауштен ила.
Тоштерыш пурымеке космосыш логалмылак чучын: «Восток», «Союз ТМА» космический корабль-влакын ужашыштым ончаш да поснак скафандрым чиен ончаш оҥай лийын.
– Мемнан спектакльыштат вич марий космонавт уло. Нуно вес планетым да тушто илыш уло але укем кычалыт. Илыш уло, но айдеме олмеш робот-влак илат. Марий космонавт-влак кенета чоншижмашан роботым вашлийыт. Сандалыкысе йӧратымаш могайрак? Робот айдеме семын йӧратен мошта мо? Нине да ятыр моло йодышлан вашмутым постановкым ончымеке пален налаш лиеш, – каласыш режиссёр.
Спектакльым муро, нейросеть полшымо дене ыштыме ятыр видео сӧрастарат.
Постановкышто герой-влакын лӱмышт моткоч оҥай, оҥартыш мутла йоҥгалтыт: Ньо-Ньок (Иван Соловьев), Лый-Лай (Марина Воронцова), Шож-Вож (Сергей Данилов), Льыр-Льыр (Иван Смирнов, Олег Кузьминых), Пыль-Пыль (Эдуард Яковлев), Льып-Льоп (Алексей Сандаков).
– Лӱмышт гоч персонажым койыш-шоктышыжо почылтеш: мутлан, Пыль-Пыль – пыльдырий, Лый-Лай – лыжга, шыма ӱдыр, Шож-Вож – агрохимик, тудын пашаже мланде, кушкыл дене кылдалтын… – рашемдышт спектакльыште модшо артист-влак.
Алевтина БАЙКОВА
Авторын отожо
