«МАРИЙ ЭЛ» ТАЧЕ

Лум тӱтан толынжак шуын огыл гынат…

Эртыше кечылаште виян йӱран тӱтан мардеж республикыште озаланен.

 Мардежын писылыкше секундышто 30 метрыш шуын. Йӱдлан тиде пӱртӱс сӱретын верлаште могай эҥегкым ыштымыж нерген соцкыл лаштыкла гочат эскераш лийын. Эшежым Угарман кундемыште тыгаяк, но луман тӱтан мардеж озаланымым пален налмеке, тудын мемнан регионыш толын шуэш манын,  лӱдыкшӧ лийын. Юмылан тау, меман дене лумжо изишак веле возын.

Могай зияным ты тӱтан конден? Озаҥ трактыште ятыр вере пушеҥге-влак йӧрлыныт. Волжск велне илыме суртын леведышыжым налын кудалтен. Параньгаште шуко пачеран кок пӧртлан эҥгек ышталтын. Ятыр кундемыште  тул йӧрен. Звенигово районышто гын ныл социальный объектлан эҥгек ышталтын.

Йошкар-Ола велке куснена гын, тыште сӱрет эшеат шучкырак лийын. 27 пушенге йӧрлын, икмынярже машина ӱмбаке. Корно пале, пече йӧрлыныт, оралтыла гыч штукатурко катлалт возеден, уремысе понар-влак пычкен шогеныт, ятыр вере тул йӧрен.

Кастенжак регион вуйлатышына Юрий Зайцев 17-18 октябрьлан чрезвычайный ситуацийлан утларак ямде улмо режимым увертарен. Сандене «Мариэнерго»-н, коммунал службо-влакын пашаеҥышт энгекым корандыме пашалан вигак пижыныт.

Марий аварийно-утарыше службын пашаеҥже-шамычат яра шинчен огытыл, тӱтан мардеж деч эҥгекшым коранденак толыныт. Звенигово районысо чодыраште вате ден марийже автомашина дене чодыра гыч лектын кертын огытыл, корным йӧрлшӧ пушеҥге петырен. Верыш кудал мийыше опетаривный группылан экшыкым кораҥдаш логалын.

С.Носова

М.Скобелевын фотожо.

Опубликовать в Одноклассники

Добавить комментарий