Йошкар-Оласе кудывечылаште шогышо, йӧрдымыш лекше леваш-влакым кораҥдылыт.
Кодшо курымын 60-шо ийлаштыже шуко пачеранлан шотлалтше пӧртлаште коҥга лийын, олтышаш пум левашыш оптеныт. Еҥ-влакат шке кӱлешышыштлан леведышан оралтым чоҥеныт. Ынде нунын кӱлешлыкышт йомын, мӧҥгешла, калыклан лӱдыкшым веле ыштат, тыгай верыште чӱчкыдын пожар ылыжеш, адакшым кудывечым тӱзатыме годым чаракым ыштат.
Йошкар-Ола администраций йӧрдымыш лекше оралте-влакым рашемдыме да пужымо пашам эртара. Пытартыш вич ий жапыште 36 адрес дене пу леваш-влакым кораҥдыме. Тений 2 левашым рончымо, кызыт 5 вере паша кая. Оралте олмышко мландым конден оптат да кумдыкым тӱзатат.
Л.СЕМЕНОВА
