Ӱмаште декабрь кыдалне Ханты-Мансийск олаште «Финн-угор студенчествын миссше-2024» конкурс эртен. Тушто Марий Эл гыч Мария Панкова сеҥышыш лектын. Тудо лаштыкнан тачысе унаже.
– Мария, конкурсышто сеҥымет дене уло кумылын саламлена. Тудлан ямдылалтме нерген кумданрак каласкален кертат?
– Конкурслан кыртмен ямдылалтме. Поснак творческий номерлан чотак тыршаш логалын. Тудым ме «Юмынӱдыр» легендылан эҥертен ыштенна.
Тӱҥ конкурсышто чийыме моло костюмемжат ты легенде дене кылдалтше лийын. Кугу таум МарГУ-н преподавательже-шамычлан каласем. Лач нунын полышыштлан, тора кундемыште воктенем улмыштлан кӧра ме пырля сеҥымашке шуынна. Тиде сеҥымаш мыйын гына огыл, нунынат.
– Очыни, школыштат творческий шӱлышан лийынат, сандене Марий кугыжаныш университетын Калыкле тӱвыра да тӱвыра кокласе кыл институтышкыжо тунемаш пуренат?
– Мый изинек кушташ йӧратем. Тидлан кум ияшак шӱмаҥынам. Тӱҥалтыште «Улыбка» йоча образцовый ансамбльыш коштынам. Варажым «Ассорти» эстраде куштымашын калык коллективышкыже ушненам. Тыгак МарГУ пелен пашам ыштыше Йоча хореографий университетыште икшыве-влакым кушташ туныктем. Мылам ӱдыр-рвезе-шамыч дене пашам ышташ моткоч келша. Поснак куан тул дене волгалтше чурийыштым ужмо умбакыже кушкаш, вияҥаш, нуным улан туныкташ, тӱвыралан шӱмаҥдаш тарата.
Тыгак спорт дене кылым кучем, йӱштылаш йӧратем. А вузышто мый «цифровой рекламе» направлений дене кумшо ий тунемам. Тиде тӱвыра дене кылдалтше специальность огыл гынат, туштат творческий шӱлыш кӱлеш. Тачысе саманыште ты профессий йодмашан да кӱлешан.
– Моторлык дене кылдалтше мероприятийыште тӱрлыжат лиеда. Ӱдыр-шамыч коклаште икте-весылан кӧранымаш шижалтын огыл?
– Конкурсын участницыже-влак коклаште ӱчашымаш йӧршынат шижалтын огыл, ваш-ваш полшен, келшен иленна, жапым пырля эртаренна. Тыгак вес калык-влакын тӱвырашт дене лишкырак палыме лияш йӧн лийын. Конкурсышто мастарлыкым ончыктышо кажне ӱдырын шочмо калыкшын тӱвыражым, йӱлажым йӧратымыже, пагалымыже шижалтын. Мылам вице-мисс лӱмым налше коми ӱдыр Олеся Данильченкон творческий номерже пеш келшен, Мордовий гыч Полина Максимова ден Кристина Железникован вургемышт моткоч мотор лийыныт.
– Конкурсышто йодыш-влаклан шочмо йылме дене вашештыман ыле. Тылат, Йошкар-Олаште шочын-кушшылан, тидым ышташ неле лийын огыл?
– Марла сайынжак ом мутлане, но умылем. Конкурслан ямдылалтме годым калыкнан тӱвыражым келгынрак шымлаш йӧн лектын. Тиде мылам моткоч шерге ыле. Шочмо йылмымат сайынрак тунемаш кумыл лектын. Тыгак марий калыкын тӱвыраж дене ӱмаште ме, МарГУ-н студентше-влак, «Россий студент шошо» фестивальыште палдаренна. Тушто марий калыкын философийжым почын пуышо да Марий кундемын моторлыкшо нерген каласкалыше спектакльым ончыктенна.
Ханты-Мансийскыште эртыше конкурсышто Кугу Отечественный сарыште 80 ий теммылан пӧлеклалтше пресс-конференций эртен. Сар дене кылдалтше теме илышыштем посна верым налеш. 9 Майыште ме уло ешна дене пырля погынена да Кугу Отечественный сарыште участвоватлыше-влакым порын шарналтена, тудо жапысе фотом ончена. Ковам кугезе кочана Георгий Петрович Милютин нерген каласкала. Тудо Берлин марте миен шуын да Йошкар шӱдыр орден дене палемдалтын.
– Чоным почын вашмутым пуыметлан тау, тунеммаштет, тӱҥалме чыла пашаштет чыла сайым тыланем.
– Тау.
Лидия ШАБДАРОВА.
Фотом еш альбом гыч налме.