Марий Эл вуйлатыше Юрий Зайцев РФ региональный вияҥмаш шотышто правительстве комиссийын президиумжын заседанийышкыже видеоконференц кыл дене ушнен. Заседанийым Россий правительстве председательын алмаштышыже Марат Хуснуллин вӱден.
Национальный да федеральный проект-влакын шукталтмышт, тыгак регионлаште корным ыштыме йодыш-влакым каҥашеныт.
2024 ийыште мемнан республикыште, «Сай качестван лӱдыкшыдымӧ корно» нацпроект дене келшышын, 230 километр автомобиль корным нормативын йодмыж семын тӧрлымӧ. Паша палемдыме графикым ончылта. Чумыр ончымаште, 569 тӱжем кв.м. кумдыкышто корнын «ӱмбал вургемжым» шарыме. Тачысе кечылан корно паша 31 процентлан шукталтын.
Ты проект почешак 17 кӱвар сооружений олмыкталтеш. Морко районышто Ировко гоч улшо кӱварым ачалыме паша умбакыже шуйна. Тудым тений шыжылан мучашлаш палемдыме. Тылеч посна, 2024 ийыште Йошкар-Ола – Уржум автомобиль кугорнышто вашлиялтше Немда эҥер гоч кӱварын реконструцийжым ышташ тӱҥалыныт. Одобеляк – Кужэҥер – Параньга корнымат уэмден тӧрлен шуктышаш улыт.
«Ял кумдыкышто транспорт инфраструктурым вияҥдымаш» федеральный программе почеш, Шернур районышто ялозанлык объектла дек шуйналтше корным ыштат. Тудын кутышыжо – 5,2 километр.
Марий Эл Республикым вуйлатышын пресс-службыжын уверже негызеш Л.СЕМЕНОВА ямдылен.
Д.Речкинын фотожо / Марий Эл Республик вуйлатышын пресс-службыжо
