Марий Эл Республик вуйлатыше Юрий Зайцев регионышто шуко шӧрым ыштен налше Медведево районысо «Семёновский» племзавод» ЗАО-шко, тыгак ялозанлык продукцийым перерабатыватлыше предприятийыш миен коштын.
Племзавод идалык жапыште шӧрым ыштен налме куатым 34 процентлан ешарен. Тудо кугыжаныш полышлан чолган эҥерта. 2035 ийыште полышын кугытшо 139 миллион теҥгешке шуын. Тидын шотыштак предприятийлан 21,9 миллион теҥгем Марий Элым социально-экономически вияҥдыме индивидуальный программе кышкарыште ойырымо.
Юрий Зайцев предприятийын транспортный средствам ачалыме у сервис рӱдержым ончен. Тудын кумдыкшо – 1,6 тӱжем квадратный метр. Рӱдерым куатле оборудований, тидын шотыштак кран дене пойдарыме. Тидыже паша лектышым кугемдаш полша.
2025 ийыште племзавод вольык ашныме Михайловка комплексым чоҥаш тӱҥалын. Тыште 1,4 тӱжем ушкалым ашнаш тӱҥалыт. Объектын акше – 1,5 миллиард теҥге. Комплексым 2027-2028 ийлаште пашаш колташ палемдыме.
Тиде кечынак предприятийын физкультур да тазаҥдыме комплексшым почмо. Тушто модмо зал-влак улыт, нуно пашаеҥ-влакын тазалыкыштым пеҥгыдемдаш полша. Комплексым чоҥаш предприятий 50 миллион утла теҥге шке оксажым кучылтын.
«Семёновский» племзавод Российыште эн шуко шӧрым ыштен налше 50 шолдыра озанлык радамыште шотлалтеш. Кочкыш продуктым шукырак да шукырак ямдыла:
*2025 ийыште 7,6 тӱжем тонн шӧрым лӱштен. Тидыже 2024 ий дене таҥастарымаште 134 процент лиеш;
*89 тонн шӱшмӱйым ямдылен (144 процент);
*11,5 тонн сырым луктын (кок пачаш шукырак);
* продукцийым ужалыме дене 3,47 миллиард теҥге выручкым налын (1,3 пачаш шукырак).
Предприятийыште ушкал да имне шӧрым перерабатыватлыме цех пашам ышта. 40 тӱрлӧ продукцийым ямдыла. Республикыштына лӱштымӧ чумыр шӧр гыч тиде предприятийлан 30 процент логалеш. Племзавод тыгак тӱкан шолдыра вольыкым да тяжеловоз урлык имньым ончен кушта. 2026 ий 1 январьлан тыште тӱкан шолдыра вольык 13,3 тӱжем вуй да 460 имне лийыныт.
Медведево районыш миен коштмыж годым регион вуйлатыше тыгак «Наше пиво» пивоваренный компаний» ООО-што лийын. Тудо Марий Элыште сырам да пурам ямдылыше ик эн кугу предприятийлан шотлалтеш. Продукцийым ямдылаш шкенан элыште ямдылыме 100 процент полтым, тыгак икмыняр ужаш умлам кучылтеш. 2020 ийыште тӱҥ сырьем йотэлла гыч кондымым тӱрыс чарнен. Ассортимент 60 утла тӱрлыш шуэш. Кызыт компаний энергийым аныклышашлан автоматизированный котельныян мини-ТЭС-ым чоҥымо проектым илышыш шыҥдара. Юрий Зайцев предприятийлан умбакыжат вияҥаш да ужалыме у рынкым муаш тыланен.
Снимкылаште: «Семеновский» госплемзаводышто; «Наше пиво» ООО-што.
Марий Эл вуйлатышын пресс-службыжын уверже негызеш Вячеслав Смоленцев ямдылен.
Денис Речкинын фотожо.
