22 майыште Йошкар-Олаште «Учаев лудмаш» IX шанче-практик конференций лиеш.
«Марий йылмым туныктымо фундаментальный негыз-влак» йодышлан пӧлеклалтше шанче форум профессор, ученый-методист Зиновий Васильевич Учаевын шочмыжлан 95 ий теммылан пӧлеклалтеш. Учёный 10 монографийым, школлан 40 утла учебник ден тунемме пособийым, вузлан 5 учебник ден пособийым да 100 утлан шанче пашам возен. Шке жапыштыже тудо «Марий коммуна» газет редакцийыштат пашам ыштен, вара вузышто ончыкылык журналист студент-влакым шке шинчымашыже да моштымашыж дене палдарен.
Мероприятий Марий образований институтышто 10 шагатлан тӱҥалеш. Пленар заседаний деч вара шочмо йылмым аралымаште СМИ-н верже нерген «йыргешке ӱстел» йыр мутланымаш да йылмым туныктымо у йӧн дене палдарыше мастар-класс эртат.
Светлана Носова
Фотом «Марий Эл» газет редакцийын архивше гыч налме
