10-16 июльышто Новосибирск олаште Геннадий Заволокиным шарныме лӱмеш эртаралтше «Играй, гармонь» VII фестивальыште Курыкмарий кундемын уста шочшыжо, Россий культурын сулло пашаеҥже, тале гармонист Арсений Яйцов мастарлыкым ончыктен да лауреат лӱм дене пӧртылын.
Тушто А.Яйцов курыкмарий да олыкмарий сем-влакым шоктен.
Фестивальыште Российын 78 регионжо да тыгак Германий, Израиль, Казахстан, Беларусь гыч 228 участник ушнен. Нунын радамыште усталык коллектив, мурышо, семӱзгарым шоктышо да гармонист-влак лийыныт.
Палемдыман, ты гана тудо фестиваль Российын калык артистше, «Играй, гармонь» телепрограммын авторжо ден вӱдышыжӧ, композитор Геннадий Заволокинын шочмыжлан 75 ий теммылан пӧлеклалтын.
«Играй, гармонь» Российысе тӱрлӧ калыкын музыкальный усталыкше дене палдара. «Икымше каналыште» 1986 ий годсек эфирыш лектеш. 2001 ийыште автокатастрофа деч вара Г.Заволокинын уке лиймекыже, тиде пашам Анастасия ӱдыржӧ ден Захар эргыже умбаке шуят.
– Геннадий Заволокин дене ятыр ий ончыч палыме лийынна ыле, а Анастасия ден Захар дене – 2017 ийыште, – рашемдыш Арсений Яйцов. – Фестиваль годым Новосибирск областьын губернаторжо Андрей Александрович Травников дене палыме лийме да кидым кучен саламлалтме шуко жаплан шарнаш кодеш.
А.Байкова
Фотом еш альбом гыч налме
