2 февральыште М.Шкетан лӱмеш Марий национальный драме театрыште Марий Эл искусствын сулло деятельже, режиссёр Василий Пектеевын спектакльже-влак фестиваль «Окса тул» постановко дене почылто.
Тудо театрын художественный вуйлатышыжын 70 ияш лӱмгечыжлан пӧлеклалтын.
Театрыште пайрем шӱлыш шижалтын. Воштончышан залыште В.Пектеевын тӱрлӧ ийлаште шындыме постановкыжо-влак гыч фотокартычке-влакым ончен лекташ оҥай ыле. А ме палена, театр искусствым вияҥдымашке Василий Александрович кугу надырым пыштен. Марий сценыште гына тудо 50 утла спектакльым шынден.
В.Пектеев – ятыр мурын авторжо. Нунын кокла гыч икмыняржын семжым Самырык-влаклан Олык Ипай лӱмеш Кугыжаныш премийын лауреатше Светлана Яндукова фортепиано дене шоктыш.
Спектакль тӱҥалме деч ончыч сценыш театр вуйлатыше Эрик Юзыкайн лекте да маэстро Василий Пектеевым калык ончыко ӱжӧ. Залыште шинчыше-влак уста режиссёрым шокшо кидсовыш дене вашлийыч. Тиде жапыштак юбилярлан театрын коллективше деч пеледыш аршашым кучыктышт.
– Изинекак артист лияш шонен иленам. Шонымашем шукталтын! Шеҥгек ончылын, тидым мый пеҥгыдын ойлен кертам: «Моткочак пиалан айдеме улам!» – мутшым тӱҥале Василий Александрович.
Варажым Василий Александрович куд икшыван ешыште шочын-кушмыжо, театр пашашке ушнымыжо, жапше годым республик деч ӧрдыжтӧ марий сцене деч посна йокрокланымыже да уэш марий калыкнан ик эн йӧратыме да тӱҥ театрыштыже пашам куанен ыштымыж нерген чон почын каласкалыш.
«Окса тул» спектакль – С.Чавайнын произведенийже-влак негызеш ямдылыме комедий. Тудын гоч театрын эртен толмо корныжо, калыкнан йӱлаже раш почылтеш. Овда, Таргылтыш, Киямат тӧра, Вӱдӱдыр-шамыч ончаш толшо-влакым воштылаш да шонаш таратышт.
– Василий Александрович кажне спектакльыштыже марий калыкын шӱлышыжым ончыкта, садлан тудым шкенжым марийлан шотлышо кажне еҥ ончышаш, – палемдыш Марий Эл Кугыжаныш премийын лауреатше, Чумыр марий йоча хорын дирижёржо Лилия Александрова. – Шарнем, школышто тунемме годымат колхоз автобус дене туныктышо-влак дене пырля спектакльым ончаш мыят толам ыле. Кажныже ойыртемалтше, сай ден удам ойыраш, шоя ден чыным, илышым умылаш туныктышо улыт.
– Василий Пектеев – талантан режиссёр. Кеч-могай спектакльым шында гынат, куанен ончымо шуэш, вет кажныштыже марий шӱлыш шижалтеш. Тудын возымо мурыжо-влакат келге шонымашан, чон гыч лекше улыт. Гармоньым шокталтымыжымат, муралтен колтымыжымат куанен ончет да колыштат! – чонжым почо Йошкар-Ола гыч сулен налме канышыште улшо Регина Мартьянова. – Театрыш ме чӱчкыдынак коштына, садлан кажне спектакльже нерген сайын палена.
– Василий Александровичын виян, марий шӱлышан режиссёр улмыжо «Окса тул» спектакль гочат раш почылтеш. Постановкышто калыкнан илышыж дене кылдалтше шуко сӱретым ужаш лиеш, сценыш лукмо ӧранвочко, шуарвондо, межым шӱдырымӧ да мушым ыштыме стан-влак гоч кушкын толшо тукымлан калыкнан ожно кече еда ыштыме пашаж нерген пален налаш пеш сай. Спектакльым гармонь, тӱмыр йӱк сӧрастарымат кумылым нӧлта, – каласышт лӱмынак Морко район гыч спектакльым ончаш толшо Лидия ден Анатолий Степановмыт да Лариса Балакирева.
Фестиваль умбакыже шуйна. В.Пектеевын шындыме спектакльже-влакым эше мартыште да апрельыште ончаш лиеш. Фестиваль 27 апрельыште «Шӱдыр лоҥго каваште» концерт ден мучашлалтеш. Тушто артист-влак Василий Александровичын мутшылан возымо муро-влакым йоҥгалтарат.
Алевтина БАЙКОВА
В.Тумбаевын фотожо
