Марий Элыште чодырам оролымо пашалан 80 миллион теҥгем ойырат.
Марий Эл вуйлатыше Юрий Зайцев Чрезвычайный ситуацийым шижтарыме да кораҥдыме шотышто республикысе правительстве пеленысе комиссийын заседанийжым эртарен. Амалжат лийын: тул ылыж кертме лӱдыкшӧ пагыт тений молгунамсе деч кок арня ончыч толын.
– Тений чодырам тул деч оролымо пашалан 80 миллион теҥгем ойырымо. Тидыже кодшо ий дене таҥастарымаште 21 миллион теҥгелан шукырак. Ты пашаш 585 техникым, 2419 оборудованийым да 2750 еҥым ушымо, – палемден Юрий Зайцев.
Чодыра пожарын тӱҥ амалже – тулым шекланыде кучылтмаш. 70 процент пожар лач тидлан кӧра лиеш.
Марий Элыште чодыра фондын кумдыкыштыжо пожар ылыжмым авиаций, патрульный-влак да 14 видеокамер эскерат.
Тачысе кечылан республикыште 31 пожар лийын, икымшыже – 18 мартыште. Тӱҥ шотышто – кукшо шудым йӱлалтымылан кӧра. Икымше чодыра пожар 4 апрельыште Звенигово районышто ылыжын.
21 апрель гыч Марий Элыште пожар ваштареш кучедалме посна режимым пуртат. Кугу чодыра пожарым писын йӧрташ ямде лияш манын, шукерте огыл тактико-специальный учений эртаралтын.
Тыгак Гражданский аралалтмаш комитетын базыже негызеш пӱртӱсыштӧ ма, техногенный сынан мА чрезвычайный ситуацийым кораҥдаш опеартивный материальный резервым тичмашын ямдылыме.
Марий Эл вуйлатышын пресс-службыжын уверже негызеш Светлана Носова ямдылен.
