Юрий Зайцев Марий Элыште антитеррористический комиссий ден Оперативный штабын иквереш чумырымо заседанийыштым эртарен.
Тушто Шошо да Паша пайрем ден Сеҥымаш кече вашеш эртараш палемдыме мероприятийлаште лӱдыкшыдымылыкым ыштыме йодышым рашемденыт. Исполнительный кучемын федеральный органже-влакын территориальный подразделенийлашт ден Марий Элын исполнительный кучем органлажын контртеррористический операцийлан ямде улмышт шотышто каҥашеныт.
Заседанийыште шушаш кеҥежымсе тазалыкым шуарыме кампаний нергенат мутланеныт. Участник-влак республик кумдыкышто верланыше йоча каныме объектлаште терроризм лийын кертме деч аралыме пашам шуктышаш нерген мутланеныт.
– Чыла тергымаш, тунеммаш лӱмжылан огыл, а кӱлеш семын шукталтшаш улыт. Тиде йоча-влакын лӱдыкшыдымылыкышт дене кылдалтеш, сандене «авосьлан» ӱшаныман огыл. Йодышым мый личный контрольышто кучем, – палемден Юрий Зайцев.
Марий Эл вуйлатышын пресс-службыжын уверже негызеш Любовь Камалетдинова ямдылен.
