Шуматкечын Кужэҥер район Пекесола ялыште шошо вӱдшорлан кӧра пӱяште вӱд нӧлталалтын. Тидлан верчын тудо дамбым «мушкын» да ик велже порволен.
Россий МЧС-ын Марий Элысе Тӱҥ управленийжын кризисный ситуаций управленийжын рӱдерышкыже тидын нерген увер пурен огыл.
Кужэҥер районысо администрацийын палдарымыж почеш, Пекесола ялыште вӱд чот шарлыме, суртлашке вӱд пурымо лӱдыкшӧ уке.
Туткар лийме верыш пожарно-спасательный гарнизонын оперативный группыжо миен.
Шке телеграм-каналыштыже Марий Эл вуйлатыше Юрий Зайцев тидын шотышто тыге палемден: «Ситуацийым контрольыш налме. Нӧлталтше вӱдын волымекше, ты верым тӧрлатат».
Л.Камалетдинова
Фотом Россий МЧС-ын Марий Элысе Тӱҥ управленийжын сайтше гыч налме
