Тӱнямбал кӱкшытыштӧ палемдалтше Потребительын праважым аралыме кече тений «Справедливый переход к устойчивому образу жизни» теме дене эрта.
Тудым Потребитель-влакын тӱнямбал федерацийышт пӱртӱс поянлык ден тӱрлӧ сатум йырвеллан зияным ыштыде кучылташ ӱжмӧ, социальный аспект-влакым вияҥдыме, илышым саемдыме шот дене темлен. Эксперт-шамычын палемдымышт почеш, йырвелым кызытак аралаш тӱҥалаш огыл гын, потребитель-влак дене кылдалтше кӱлешан шуко йодыш лишыл жапыште палынак пӱсын шогалын кертеш.
Пайдадыме продовольственный системе да кӱнчен лукмо топливе деч зависитлымылан кӧра кочкыш сату ден энергий тӱня мучко шергештыт, тыгодымак кажне ийын эн шагалже индеш миллион еҥ лавыран йырвелыште аярген але черланен кола. Сандене потребитель-шамычлан экологий велым яндар да тазалыклан пайдале продукт ден сатум ойырен налаш йӧным ышташ, а пӱртӱс поянлык дене пайдаланыме годым йырвелым амыртыме деч аралаш кӱлеш.
Потребительын праважым аралыме кече ынде 40 ий утла палемдалтеш. Тудо потребительын праважым аралыше, бизнес ден правительствын еҥже, шӱкӧ шӧрынан форум ден академический кружок-влак коклаште пеҥгыде вашкылым ыштымашке ий гыч ийыш кугу надырым пышта.
Маргарита Иванова
