Марий Эл Республикым вуйлатыше Юрий Зайцев мобилизоватлыме граждан-влакын ешышт дене кылым умбакыжат кучаш да нунылан тӱрлӧ семын полшаш задачым шынден.
Регионым вуйлатыше ужашын мобилизоватлымылан полшымо шотышто координационный советын черетан заседанийжым тӱҥалме деч ончыч тымарте лукмо чыла пунчалын сайын шукталтмыжым палемден.
«Эртыше совещаний деч вара коллегына-влак боецна-шамыч деке миен коштыныт, нунын илыме йӧныштым, мом ыштымыштым онченыт. Тыге лектын коштмо деч пайда уло: игече начареммылан кӧра мобилизоватлыме-влак кокла гыч южышт сезонный манме чер дене черланеныт, пӱй корштымыланат вуйым шияш тӱҥалыныт, сандене тиде йодышым решатлаш пунчалме», – палемден Ю.Зайцев.
Военнослужащий-влаклан да нунын ешыштлан социально полшымо мере-шамыч нерген Марий Элын калык илышым саемдыме шотышто министржын пашажым шуктышо Марина Островская каласкален. Регионым вуйлатышын кӱштымыж почеш, кажне ешлан социальный паспортым почмо. Тидыже кӱлешан полышым адресно пуаш йӧным ыштен. Тымарте 1743 еҥлан ик гана ойыралтше 50 тӱжем теҥге кугытан выплатым тӱлымӧ. 1709 социальный паспортым ыштыме, тыгодым ешлаште лачшымак могай нелылык вашлиялтмым рашемдыме. Тидак Марий Эл Республикым вуйлатышын мобилизоватлыме граждан-влакын ешыштлан полшымо ешартыш мере-шамыч нерген указшым ямдылен лукташ тӱҥ негызым ыштен. Документ дене келшышын, военнослужащийын ешысе иктаж еҥжым мӧҥгыштӧ социально обслуживатлаш, стационар социальный организацийлашке черет деч посна колташ, санаторий-курорт тӧнежлашке путёвкым ойыраш, йоча-влаклан «Журавушка» рӱдерыште каналташ да тазалыкым пеҥгыдемдаш, «Доверие» рӱдерын специалистше-шамыч деч психологический полышым налаш лиеш. Палемдыме мере-влак дене пайдаланаш праван кажне ешлан полшена, южо йодышым посна ончена, палемден М.Островская.
Министерствым вуйлатышын каласкалымыж гыч, «Доверие» рӱдерын психологшо-влакым Ульяновск областьысе воинский частьыш намийыме, туштыжо нуно мобилизоватлыме-шамычлан да вуйлатыше составлан индивидуальный консультаций ден тӱшка занятийым эртареныт. 56 боец ешыжлан полшаш йодын. Чыла йодышым ончымо.
Мобилизоватлыме-шамычын йодмышт почеш казармылаште вентиляций системым шупшмо, электрический да дизельный пушко-влакым, теле вургемым да медикаментым намийыме.
Тазалык аралтыш министрын алмаштышыже Татьяна Бастракова мобилизоватлыме граждан-влакын ешышт гыч южо еҥым врач-специалист-шамычлан ончыктымо да медицине велым обслуживатлыме, 13 йочам «Кичиер» санаторийыш колтымо нерген ойлен.
Минздравын пашаеҥже-влакат Ульяновск областьысе воинский частьыш миеныт, эмлыме препаратым намиеныт. Медик-шамычын бригадышт 252 еҥын тазалыкшым терген.
Специальный военный операцийым эртарыме кундемла гыч пӧртылшӧ мобилизоватлыме чыла еҥлан медицине полышым черет деч посна пуат, реабилитацийымат тыгакак эртарат, палемден Т.Бастракова.
Профессиональный образовательный организацийлаште шинчымашым погышо 65 студентым да 385 школьникым шокшо кочкыш дене яра пукшаш тӱҥалме, 4 студентым тӱлыман гыч яра тунеммашке кусарыме, 5 йочалан кугыжаныш образовательный организацийыште верым черет посна ойырымо, 457 еҥым йочасадлан тӱлымӧ деч утарыме, вузлаште тунемше 15 студентлан 2000 теҥге кугыт стипендийым палемдыме, радамлен образований да науко министрын пашажым шуктышо Лариса Ревуцкая.
Тыгак #МеПырляУлына штабын да студент ден педагог-шамыч кокла гыч волонтёр-влакын пашаштым кӱкшын аклыме.
Молодёжный политике, спорт да туризм министрын пашажым шуктышо Лидия Батюкова «Авангард» рӱдерын базыштыже боевой действийлаште лийше военнослужащий-влакын доброволец-шамычым мобилизаций деч ончыч ямдылымышт нерген каласкален. Огневой, тактический, инженерный да военно-медицинский ямдылалтмаш шотышто занятий-влакым эртараш ешартыш материальный базым налме.
Специальный военный операцийыште участвоватлыше военнослужащий-влакын ешыштлан спорт объектлашке пураш льготан акым ыштыме.
Тылеч посна «Авангард» рӱдерын специалистше ден «Боевое братство» пӧлкан еҥже-шамычым Ульяновск областьысе тунемме рӱдерыш отделений командир-шамычлан разведовательно-поисковый пашам шуктымо годым действийын тактикыже-влак шотышто ямдылалтмашым эртараш наҥгаяш палемдыме.
Тӱвыра, печать да калык-влакын пашашт шотышто министр Константин Ивановын мутшо почеш, 2022 ий сентябрь гыч мобилизоватлыме граждан-влакын ешыштлан театрлашке билет яра ойыралтеш. Военнослужащий ден мобилизоватлыме-шамычын йочаштлан У ий вашеш тӱрлӧ мероприятий эртаралтеш.
Ульяновскысо военный тунемме рӱдерыш концерт дене миен толаш культур десантлан йӧным ыштыме, палемден К.Иванов.
Ужашын мобилизоватлымылан полшымо пашашт дене политический партий да мер организаций-влакынат еҥышт палдареныт.
Марий Эл Республикым вуйлатыше Юрий Зайцев мобилизоватлыме граждан-влакын ешышт дене кылым умбакыжат кучаш да нунылан тӱрлӧ семын полшаш задачым шынден.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
