УВЕР ЙОГЫН

Кузе сылнын йоҥгат: Марий Эл да Йошкар-Ола!!!

4 ноябрьыште Российыште Калык-влакын икоян улмо кечыштым, а Марий Элыште ресубликнан шочмо кечыжым палемдена. Марий Эллан – 101 – ик курым да ик ий.

1920 ий 4 ноябрьыште Всероссийский рӱдо исполкомын да РСФСР Калык комиссар-влак советын посна декретше дене Марий автономный область ышталтын.

Тидыже мыланна калык семын вияҥаш йӧным пуэн. Озаҥ, Виче, Угарман, Ӱпо да Екатеринбург губернийла мучко  шаланен  пытыше марий-влакын иктеш чумырымо илыме кундемжыланат, тудын экономикыжлан, социал, мер илышышлан, тӱвыражлан, йылмыжлан вияҥаш корным почын. Но тидын годымак ме 101 ий утла шуко национальностян кугыжанышнан ойыраш лийдыме ужашыже семын  вияҥынна да тачат лач тыгай кодына.

Марий Эл –  могай тудо таче? Шкенан кумдыкна, символикна, Конституцийна, кугыжаныш кучемна, вуйлатышына улыт. Ялозанлык, экономике, промышленность, социал велымат вияҥме шотышто моло регион деч вараш огына код, южо сферыште ончылнат каена. 14 муниципал район ден 3  оласе округышто калыкна шке илышыжым ворандара да тӱзата. Рӱдоланан, республикынат лӱмышт  марла пеш сылнын йоҥгат: Йошкар-Ола, Марий Эл!!! Шукертак шеҥгелан кодын тудо жап, кунам рӱдоланам рушла «кугыжан олаже» маныныт да марий-шамычлан тушто илашат чареныт.

Южышт олан тӱжвал сыныштыже марий шӱлыш шагалрак маныт гынат, тудо уке огыл. Таче ме тидым фото-влак дене пеҥгыдемдена. Кеч ик-кок сакышыштыже ой-влакым йоҥылышракат возат, но тидат тудын марий сынжым, шӱлышыжым ӱмылтен ок керт.

С.Носова

Опубликовать в Одноклассники

Добавить комментарий