Элыштына пайдале кочкыш дене кумдан палдарыме да йоча-влакым кояҥме деч аралыме платформо пашам ышташ тӱҥалын.
Кояҥмашым 21-ше курымын инфекциян огыл пандемийже маныт. Уто нелытым погымо тӱҥ амал эн ончычак шотдымо кочкыш рацион дене кылдалтын.
Таче коя еҥ-влакын радамышт самырыкемын толеш. Россий Минздравын палдарымыж почеш, тыгай шотан ситыдымашым 15-17 ияш-шамыч коклаште пеҥгыдемдат. Педиатр-влакын мутышт гыч, коя йоча-шамыч утыжденат тургыжланат, шкеныштым ӱлыкшын аклат.
«Кызытсе школьникын капкылже кечын гаяк нелемеш. Кояҥмаш – тиде тӱжвал тӱсын ситыдымашыже веле огыл, тыгак илышлан лӱдыкшӧ чер-влаклан: вӱргорно гипертонийлан, дислипидемийлан, сакыр диабетлан – вияҥаш келшыше платформо. Капкыл нелытын индексшым рашемдышашлан ача-ава-влаклан шочшыштым поликлиникыш диспансеризацийым эрташ наҥгайыман», – манеш Терапий ден профилактике шотан медициным научнын шымлыше медицине рӱдерын директоржо, Россий Минздравын терапий да тӱшка врачебный практике шотышто штат деч ӧрдыжсӧ специалистше Оксана Драпкина.
Пайдале кочкыш дене кумдан палдарыме да йоча-влакым кояҥме деч аралыме платформым Российын Минздравше ден «Национальные приоритеты» АНО почыныт. Нигӧланат секрет огыл: кызыт подростко-влак эсогыл эн пагалыме еҥын йодмашыж ден темлымашыжым шотыш огыт нал, а тиде платформо нунылан модыш гоч шоналташ да шкем чын кочкаш туныкташ йӧным ышта.
«Росстатын увертарымыж почеш, кояҥме сӱрет поснак 15-17 ияш-влак коклаште палдырна. 90 процент пациент утыждене кочмыжлан да таза огыл илыш-йӱлам кучымыжлан кӧра коям пога, шотлат врач-шамыч. Ме таза илыш-йӱлан принципше-влак ден подростко-шамычын «кушкын шумекем, кӧ лиям?» йодышышт коклаште кылым муаш шонен пыштенна. Шке пашаште профессионал лияш манын, тазалыкым эскераш кӱлеш. Чын кочмаш – ӱшанле негыз, тудо куатым ешара, вуйушым саемда, кумылым нӧлта. «Национальныепроекты.рф/думайчтоешь порталыште шкем тӱрлӧ профессийыште терген ончаш, кочмо шотышто темлымашым налаш лиеш – чыла тиде карьерым ышташ полша. Российысе национальный проект-влакын ик эн ончыч шуктымо пашашт калыкым тазалыкым эскераш туныктымо денат чак кылдалтын», – палемда «Национальные приоритеты» АНО-н генеральный директоржо София Малявина.
Порталышке школьник-влаклан поснак келшыше профессий-шамычым (блогер, режиссёр, врач, шанчызе, биотехнолог, разработчик да моло) пуртымо. Кажне профессийын шке ойыртемже уло: врачын иммунитетше пеҥгыде лийшаш, режиссёр ик верыште шинчен кертшаш… Тидым пеҥгыде тазалыкын полшымыж дене веле ышташ лиеш. Подростко-влак тыгак продуктын пайдалыкше нерген пален налыт, уто нелытым кудалташ полшышо врач-шамыч дене палыме лийыт. Мом пален налмым ача-авалан каласаш да вара келшыше специалистын консультацийышкыже возалташ лиеш.
Подростко-влак национальныепроекты.рф/думайчтоешь порталыште Телеграмм мессенджерыште пашам ыштыше «Образ жизни» сообществын ЗОЖный стикерпакшым налын кертыт.
«Демографий» национальный проектын «Укрепление общественного здоровья» федеральный проектше калыкын тазалыкшым пеҥгыдемдымашке виктаралтын.
М.ИВАНОВА ямдылен
Марий Эл Тазалык аралтыш министерствын фотожо
