Марий кугыжаныш университетыште илышыш пурталтше «Приоритет-2023» программын кышкарыштыже «Языки.Культуры.Этносы» тӱнямбал форум эртен. Тудо Марий Элыште кусарыше-влакым ямдылаш тӱҥалмылан 25 ий теммылан пӧлеклалтын.
Форумышто тӱнямбал кӱкшытан конференций лийын. Тудо кусарыме паша дене кылдалтше йодышым шымлыше, тыгак художественный текстым, тунемме технологийым да молым кусарыше-влакым иктеш чумырен. Погынышо-влаклан 18 йылме дене мастер-класс ончыкталтын. Форумын ик эн оҥайже семын кулинар турнирым палемдаш лиеш. Тушто тӱрлӧ эл гыч 34 участник шке калыкшын кочкышыжым ончыктен. Тиде веле огыл – нуно шке йылмышт дене мурым муреныт, куштеныт, презентацийым ыштеныт. Мероприятийыш чылаже 3500 еҥ ушнен.
Форумышто Кусарымаш дене преподаватель-влакын ассоциацийыштын президентше Наталья Нечаева, Российысе кусарыше-влакын ушемыштын Санкт-Петербургысо пӧлкажым, «Литерра» компанийым вуйлатыше Илья Мищенко, «PROtranslation» проектын да кусарыше компанийын ректоржо Эмма Каирова лийыныт. Марий кугыжаныш университет ден Кусарымаш дене преподаватель-влакын ассоциацийышт вашкылым кучымо шотышто ойпидышым ыштеныт. Тудын дене келшышын, Марий Элыште кусараш туныктымо методический школым почаш, тыгак кӱлеш методике полышым да консультацийым налаш йӧн-влак лийыт. Форумышто палемденыт: тиде ошкыл кусарымаш областьыште да тидлан туныктымо пашаште тыршыше-влаклан сай тӱҥалтыш лийшаш да Марий Элыште йылме образованийын вияҥдышаш.
Г.Кожевникова
Фотом Марий кугыжаныш университетын сайтше гыч налме
