Тиман почиҥга ял Шернур посёлко деч тораште огыл верланен. Ме тушко Памашсола ял гыч, пасу гоч, толынна. Ты кундем Тиман курыкнерже дене палыме. Тушто кушшо пушеҥге-влак кадыргырак улыт, молан манаш гын кӱым «ондален» кушкыт. Курыкын эн кӱкшака верышкыже кӱзаш гын, йырваш ужар олыкым, кумда пасум, чапле пӱнчӧ чодырам да мотор куэрым ужаш лиеш.
Тиман почиҥгам изи эҥер кок ужашлан пайла. Эҥер гоч йолын коштмо пашма уло. Тушко мийымына годым йоча-влак велосипед дене верысе памашыш вӱдлан воленыт ыле. Тиман памашын яндар вӱдшӧ изи эҥерыш йоген пура. Тынеш пурышо марий калык Крешене кечын тушко йӱштылаш толеш, тидлан лӱмын верым келыштареныт, вет тысе вӱдын илыше вийже нерген чыланат палат. Памаш воктене, шола велне, изи ер уло. Тудым верысе калык шке коклаште Вувер ер манеш.
Тиман курыкын шке легендыже уло. Ожно тусо курыкпомышышто осал еҥ-влак толымо шӧртньым шылтен пыштеныт манын ойлат. Тунам пещерже ятырлан келге лийын. Жап эртыме семын ошма йоген да тушто чумырымо погым, шӧртньым курымешлан тоен. Южышт кызытат Тиман курыкышто тойымо шӧртньӧ уло манын ӱшанат, но але марте иктат муын кертын огыл.
Тыгак курыкышто 2022 ий гыч ветеран-влак коклаште «Тиман курык» ече дене таҥасымаш эрта. Икманаш, тиде оҥай да шкешотан вер шке йырже эре калыкым чумыра.
Михаил СКОБЕЛЕВ,
Лидия ШАБДАРОВА
М.Скобелевын фотожо.
