Марий Элыште, йӱран игечым ончыде, кормам умбакыже ямдылат.
Тенийысе игече ӧрыктарыше: шошо мучаште кеҥежымсе гай шокшо шогыш, вара чӱчкыдын йӱр тольо. Тидыже вольыклан кургым ямдылаш кугу чаракым ыштыш. Ялозанлык да кочкыш сату министерствын увертарымыж почеш, июль тӱҥалтышлан тыгай амалланак кӧра Курыкмарий, Марий Турек, Оршанке районлаште кукшо шудым ямдылыме пашашке эсогыл ушнен кертын огытыл.
Шушаш телылан республик мучко чылаже 41,8 тӱжем тонн шудым шапашлыман гын, 2 июльлан 3,8 тӱжем тонным аралаш пыштыме, планым 9 процентлан темыме. Кодшо ийын тиде жапланак 4,4 тӱжем тонным ямдылыме. Эн шуко, 1,2 тӱжем тонным, Морко районышто шапашленыт.
Сенажым ямдылымаште сӱрет кунар-гынат куандарыше. Тений тудым план почеш чылаже 303,7 тӱжем тонным, але кодшо ийысе деч 102 тӱжем тоннлан шукырак, шапашлыман. Кызыт марте 130 тӱжем тонным оптымо, планым 43 процентлан темыме. Таҥастарена: ӱмаште тиде жаплан 82 тӱжем тонным ямдылыме улмаш.
Волжский район планым эн ончыч эртарен темен, палемдымын 120 процентшым ямдылен. Советский, Звенигово районлаште ты паша удан огыл ушнен толеш. Эн шуко, 45 тӱжем тонным, Медведево район шапашлен. Тыгодымак У Торъял район ты пашашке ушненат огыл.
Силосым тений 241,6 тӱжем тонным ямдылышаш улына. Кызыт марте вынемлашке 59,6 тӱжем тонным пыштыме. Кодшо ийын тиде жапланак 71,4 тӱжем тонным оптымо ыле. Эн шуко, 23 тӱжем тонным, У Торъял район шапашлен, Шернур район – 11,5 тӱжем тонным. Тыгодымак Курыкмарий, Морко, Параньга район-влак але ушнен огытыл.
Озанлыклаште кокияш шурным ӱдаш пасум ямдылат. Кызыт марте 14,5 тӱжем гектар такыр пасушто мландым пушкыдемдыме.
Снимкыште: Медведево районысо «Семёновский» госплемзавод» акционер ушемыште кургым ямдылыме паша ушнен толеш.
Иван Речкинын фотожо.
