Курчакым ыштыше да мӱкшым ончышо еш
– Провой кундем Нурда ял гыч улам, – ойлаш тӱҥале Чакмарий селаште илыше Нина Петровна Дмитриева. – Шолэҥер школ деч вара Оршанке педучилищыш тунемаш пуренам. Марий кугыжаныш университетыште биологлан заочно тунемынам. Эн ончыч Звениговысо икымше №-ан лицейыште, кокымшо №-ан школышто биологийым туныктышылан ыштенам, вара Чакмарий школыш куснышым. Молан? Тыште мариемын пӧртшӧ лийын. Тыге ынде ялыште илена.
Дмитриевмытын сурт-печышт шкешотан. Суртоза Николай Станиславович у пӧртым шке проектше почеш латвич ий ончыч ыштен. Озаватын ойлымыж почеш, пелашыже – пеш тале кидмастар. Изи улмыж годымак ачаж пелен коҥгам оптен коштын, тыге шкежат кидмастар лийын да моштымашыже дене чапланен.
Шкан суртым ыштыме годым мастарлык моткочак кӱлеш лийын, санденак тудо ик еҥымат йодын огыл, леведышым петыраш гына родо-шамыч полшеныт. Икманаш, саварымат, левашымат, аркымат, машинавечымат да молымат шке ыштен. Пелашыже Нина Петровнат кидлан мастар. Тудын ыштыме ямдылыме мотор курчакымак налаш.
– Тидлан Оршанке педучилищыштак тунемынам, – ойла ӱдырамаш. – Мыланем труд урок годым туныктышто Таисия Корнилова ончыктен да – кумылаҥым веле! Йочасадыште ыштыме годым икшыве-влак дене, шун дене нӧнчен, школлан ятыр курчакым ямдыленна.
Кызыт марием Шимшургаште мӱкшотарым куча. Тушечак келшыше шуным конда, тушто тудо пеш сай, курчакым ышташ.
– Чакмарий школышто ятыр ий «Фантазер-влак» кружокым вуйлатенам, – ойла Нина Петровна. – Шун дене веле огыл, моло материал дене тӱрлымат ыштылынна.
Мутланыме годымак пӧрткӧргым ончем. Икымше пачашыште – кумда пӧлем. Воктеныжак – теле сад верланен. Тушто могай гына пеледыш ок куш! Теле садым эртен кокымшо пачашыш мотор тошкалтыш дене кӱзышна, вара, малыме верым ончен лекмек, кухньыш, цокольный этажыш волышна.
– Аркым пелашем оптен, а мый тудым сылнештаренам, – ойла озавате. – Теве воштончыш авыртыш шем тӱсан ыле, а мый ош чия дене чиялтенам да лукыш кок суксым вераҥденам.
Суксо шотышто ойлаш гын, тудыжо тыште могай да кушто гына уке! Изиат, кугуат, пырдыжыштат, шӧрлыкыштат…
– Кызыт интернет гоч матрёшкым налам да тудым шке семынем сылнештарем, – умбакыже палдара Нина Петровна.
Озавате дене уэш уремыш лекна. Ик кугу леваш йымалне – машинавече, туштат ятыр скульптур коеш. Яндан омсаштыже – янда шер гыч мозаике, нуно кечыйолеш тӱрлӧ тӱс дене волгалтыт. Чыла вере ару да мотор. Нина Петровна радынамат сӱретлаш мастар, а эше пеледышым ончен кушташ йӧрата.
Икманаш, тиде еш пашам веле огыл, моторлыкым йӧрата, сандене чылажымат чонлан келшышым да сылным ышташ тырша.
М.СКОБЕЛЕВ
Авторын фотожо
