Курчакше калык гай тӱрлӧ
Кодшо арня мучаште Йошкар-Олаште «Калык вургем пайрем унала ӱжеш» фестиваль эртен. Тудо кок ийлан ик гана лиеш. Тений мероприятийыш Российым тӱрлӧ регионжо гыч кидмастар-влак толыныт. Фестивальын изи огыл ужашыжым курчак дене кылдалтше ончер налын. Тушто чумырымо кажне пашажат ойыртемалтше.
Теве мӱндыр Ямал-Ненец автономный округ Ямал районысо Новый Порт села гыч уна-влак, шке мастарлыкыштым ончыкташ манын, кужу корным (вертолёт, поезд дене) вич кече толыныт. Елена Худи ден ӱдыржӧ Нина Сэротэтто ненец калыкын кеҥежымсе вургем коллекцийыштым конденыт.
Ханты-Мансийск ола гыч Российын калык мастарже Мария Эккертынат пашаже-влак кумылым савырат. Тудо «Илыше йӱла» («Живая традиция») студийым вуйлата. Карелий гыч Инга Гаевская курчак коллекцийже дене палдарен. Тудо шкежат карел калык вургемым чиен толын. Коми Республик Сыктывкар ола гыч Генрих Немчинов «Аэрофото ончерым» конден. Пеленже Светлана пелашыже, изи Томас эргыже толыныт. Удмурт Республик Алнаш села гыч кидмастар-влак Надежда ден Дмитрий Рябчиковмытынат пашашт дене палыме лияш йӧн ыле. Дмитрий писте ний гыч йыдалым, сумкам, корзиҥгам, пестерьым пидеш, а пелашыже удмурт калык вургемым курчаклан урга, сӧрастара, ӱдырамаш вургемланат сӧрастарышым ышта.
Фестивальым иктешлыме годым искусствовед, жюрин членже Полина Зенкина тыгерак каласыш: «Курчакым да сӧрастарышым моткоч сайын, моторын, калыкын йӱлажым шотыш налын ыштыме».
Михаил СКОБЕЛЕВ
,Лидия ШАБДАРОВА
М.Скобелевын фотожо