Кажне айдемын шке илыш пӱрымашыже. Икте таза шочеш гын, весылан юмо ты шотышто утларак чытышым колта. Очыни, санденак тыгай еҥ-влак уло кӧргӧ вийыштым пыштен, тыглай таза еҥ семынак илаш тыршат, ыштен кертме, кумылым нӧлтышӧ сомылым шуктат. Тыгодым ойырен налме пашашкышт уло усталыкыштым пыштат.
Денис Пайбактов Марий Турек районысо пу гыч пӱчкедыше уста кидмастар семын Тошкем ялыште веле огыл палыме. Тазалык шотышто ойыртемалтше рвезе верысе школым тунем лектын. А вара ача-аваж дене пырля куш тунемаш пураш шонаш тӱҥалыныт. Йошкар-Оласе политехнический техникумым ойырен налыныт. Рвезе ЭВМ оператор лияш шонен. Но тазалыкшылан кӧра тудо тушто тунем ок керт манын ойленыт, сӱретче оформительлан шинчымашым налаш темленыт. Мо шонеда, рвезе техникумым ик эн сайын пытарен да тунамак пу гыч пӱчкедаш кумылаҥын. Мӧҥгыш пӧртылмекыже, йӧратыме пашам шуен. Могай гына арверым шке кид дене ыштен огыл: окна янак, серга, палисадниклан балясине, тумбычко, тыглай да юмо шӧрлык, фоторамке, журнал ӱстел да тулеч моло сылнештарыш. Кажне арверым ышташ кужу жап шинчылташыже логалын.
«Теве ынде шымше лобзикымат пытарем», – каласыш шкеже. Чыла пашам тудо сурт пеленысе мастерскойыштыжо ышта. Тушто тӱрлӧ ешартыш ӱзгарым чумырен. Ача ден аваже Алевтина Петровна ден Василий Лукоянович Пайбактовмыт сурт-печым шкештак нӧлтеныт, тӱзатен шынденыт. А таче кудывечышкышт пурет гын, кажне лукыштыжо, манаш лиеш, Денисын кидшым шижат. Капка гоч пуренак шинчын каналташ ыштыме креслым ужым, пӧртончыл воктене – пеледыш шындаш арвер, монча, мастерской, вӱта пырдыжлаште – тӱрлӧ сылнештарыш, шӧрлык… Чылажымат серга дене сылнештарыме. Эсогыл пӧртыш пурымо омсажат моткоч ойыртемалтше, серган оҥа-влакым келыштарыме. Пӧрт кӧргыштӧ пырдыжыштат, луклаштат рвезын пашаже-влак кечат.
Посна еҥ, эсогыл кугу озанлык вуйлатыше-шамыч тудын деке пу гыч пӱчкеден ыштыме паша-влакым шукташ йодын толыт. Денис ты але вес арверже сылнырак лийже манын, шонымашым интернетыште кычалеш, вара шкак эскизым ышта да пӱчкеден луктеш. Санденак кажне пашаже ойыртемалтше улыт.
«Кеч пытартыш жапыште южышт мыйын пашам пеш шулдын налнешт. Тидлан мыняр жап кайымымат умылаш огыт тырше. Эшежым оҥам ситарыме шотыштат нелылык лектын. Санденак пытартыш жапыште мый шагалрак пӱчкедаш тӱҥалынам», – каласыш мастар вашлийме годым.
Тудын деке командировкышто лийме годым палыме лияш пурен лекна. Вучыдымо уна семын, манаш лиеш. Но мемнам ты ешыште тыге шокшын да порын вашлийыч, каласен кодыде омак керт. Ялысе марий-влак веле тыгай улына, очыни. Ала-мо жапыште Алевтина Петровна ӱстебал чесымат поген шындыш. Ӱстелтӧрыштӧ пырля тӱрлӧ нерген мутланен шинчышна. Денисын ачаж ден аваже коктынат инвалид улыт. Ачаже – эше армийыште лийме жап гычак, а аваже шукерте огыл гына неле черым сеҥен лектын, «Пелашем, йолташ ӱдырем-влак полшеныт, моткоч тау нунылан. Чот ойгырымылан кӧра 17 килограмм нелытымат кудалтенам, – каласыш ӱдырамаш.
Мо оҥайже, мужыр пелаш коктынат Нартас техникумышто зоотехниклан тунем лектыныт. Алевтина ятыр ий верысе озанлыкыште ойырен налме пашам шуктен. Ойырен налме профессий, еш илыш, ваш келшымаш, ты але вес чер молан айдемылан пуалтме, чон ойгырымаш, куан нергенат мутланышна. Оза-влак шкешт нергенат чон почын каласкалышт. Моткоч пашаче, поро кумылан, икте-весылан, молылан эре полшаш кумылан марий ешлан лач тыгай улмыштлан тауштымак шуэш.
Светлана Носова
Снимкылаште: Денис Пайбактов да тудын пашаже-влак.
Авторын фотожо
