Санкт-Петербургышто икымше гана совет жап годым лийынам. Сандене йӧн лекме годым тудым угыч ончалаш пеш оҥай ыле. Олажым кузе огыт лӱмдӧ: Санкт-Петербург, Петроград, Питер. Мыланем гын Ленинград лӱмжӧ поснак лишыл. Тиде ола дене Российын историйже кылдалтын: Финляндий вокзал, «Аврора» крейсер, Дворцовый площадь, Смольный, Петропавловский крепость…
Совет жап дене таҥастараш гын, ола чотак кушкын, уремлаже лопкаҥыныт, ятыр тоштер уло. Эрмитажшак мом шога! Санденак Санкт-Петербург Российын тӱвыра рӱдолажлан шотлалтеш. Тыште ятыр оралтын леведышыже башне сынан, тыгак шӧртньӧ шпиль-влак улыт, нуно шпаге семын сур кавам пуйто «шӱтат». Очыни, тидланак кӧра тушто эре вӱдыжгӧ да йӱран игече шога. Мутат уке, тидым мыскара семын ойлем.
Шошым миенам. Ты пагытыште моторлык поснак шижалтеш: йырваш сирень, тюльпан-влак пеледыт. Лач пушеҥгыже тушто шагалрак. Сандене калык Кеҥеж садыште, Нева эҥер воктене кана. Нева эҥерын набережныйыштыже лийме годым йолем икмыняр гана шӱртньыш, молан манаш гын южо вере тротуарысе кӱ плиткыже-влак верышт гыч тӧргалтыныт, тиде йӧндымылыкым луктеш. Коштмо годым шекланыман, уке гын камвозашат лиеш. Тиде изиш кумылым волтыш. Содыки Санкт-Петербургыш шуко турист коштеш, тугеже чылажымат шотыш кондыман.
Эҥер сер ден коштмо годым трамвай ден теплоход-влакын ийын кайымыштым ончаш оҥай ыле. Кажне вӱд транспортышто турист тӱшка-шамыч койыныт. Нева эҥер гоч чылаже 342 кӱвар, 13-шо – кок велке нӧлталтше, ятыр канал уло.
Экскурсовод, XVII-XVIII курымсо вургемым чиен, турист-влакым сымыстарат, тыгак пырля фотош войзалташ лиеш, мутат уке, яра огыл. Уремысе семмастар-влакат сылне семыштым яра огыт колыштыкто, а сӱретче-шамыч верысе пейзаж-влакым налаш темлат.
Невский проспект мыланем ончыч мийымем годымсо деч лопкарак чучо. Тушто кочкаш, чайым подылаш кафе ятыр, но чыла вере гаяк черетыште шогыман. Верысе калыкым, мыйын шонымаште, вигак палаш лиеш, поснак илалше ленинградке-влакым. Нуно вуйыштышт лопка але изи шляпам чият да вашкыде коштыт.
Санкт-Петербургышто южо оралтын фасадшым олмыкташ, мушкаш да чиялташ уто огыл. Тошто пӧрт-влакын фасадышт Нева эҥерын кок могырышкыжо ончат. Уремыште мардежын пуалмыже сайынак шижалтеш, поснак Финн заливыште.
Ме Российын йӱдвел рӱдолаштыже май мучаште лийынна, тунам олан шочмо кечыжлан ямдылалтме шижалтын. Тудым 27 майыште палемдышаш улыт ыле. Поснак моторын Дворцовый площадьым сылнештареныт, сцене-влакым ямдыленыт. Тиде площадьшым лӱмын йолешке-влаклан ыштыме. Санкт-Петербургышто шуко ужмо шуын, но жап чӱдылан кӧра «Теле полатым», Исаакиевский ден Казанский собор-влакым, Храм Воскресения Христова на крови (Спас на крови) храм-памятникым веле ужынна, нуныштымат – тӱжвачын веле. Ончен кошташ гын, ик арнят ок сите, докан. Йӱдвел рӱдола мемнам сайын вашлийын, тушко миен толаш кумыл эше уло. Ӱшанем, ты олашке эше ик гана веле огыл корно почылтеш.
М.СКОБЕЛЕВ
Авторын фотожо
