Йошкар-Олаште марий КВН-мыскара модыш икымше гана 2000 ийыште эртен. Тунам тушко Марий кугыжаныш педагогический институтын студентше ден М.Шкетан лӱмеш кугыжаныш драме театрыш Москосо вуз гыч тунем толшо самырык артист-влакын командышт ушненыт. Шарналтеш ты конкурс – чылажат пеш веселан эртен. А кодшо кугарнян марий КВН латикымше гана Калык тӱвыра пӧртыштӧ эртыш. Тидлан республикысе Марий тӱвыра рӱдерлан тауштыман: угыч тудым ылыжтен колтымыжлан.
Тенийысе КВН Еш идалыклан пӧлеклалтын да ныл командым чумырен: Йошкар-Ола гыч «Кечан кече» (капитан — Валентина Семёнова), «Манеш-манеш» студент тӱшка (капитан – Ирина Петрова), «ЛУ-КА» (капитан – Игорь Попов), Пошкырт кундемысе Мишкан села гыч «МММ» (капитан – Алексей Ибулаев). Сандене модыш регион-влак кӱкшытыштӧ эртен манын палемдыман. Весымат ончыктыман: кодшо ийын Мишканысе историко-культурный рӱдер тыгак икымше гана КВН модышым эртарен.
КВН модыш тугай тудо: участникше-шамыч мыняр тӱрлӧ ийготан, шинчымашан але тӱрлӧ сферыште ыштыше улыт, тунар оҥайракын эрта. А тений тушко школышто, университетыште тунемше, тыгак тӱрлӧ, утларакше творческий сферыште ыштыше-влак ушненыт. Сандене кажне конкурс ойыртемалтшын, шарнымашеш кодшын эртен, жюриланат, ончаш мийышыланат йокрок лийын огыл. Ик командын презентацийыштыже ончышо-влак коклаш модыш колян «чоҥештен» толмыж годым туг-а-й варгыжмаш шогыш…
Участник-влакым саламлышыжла, рӱдер директор Ирина Якаева палемдыш: ты конкурс марий калыкнан тӱвыражым, йӱлажым кумданрак шараш, талант-влакым кушташ полша. Команде-шамычым аклыше жюриштат пагалыме, мыскарам умылышо еҥ-влак лийыныт: Марий книга савыктыш пӧртын директоржо Эдуард Иманаев, «МЭТР» каналын пашаеҥже, шкежат мыскара шӱлышан ӱдыр семын палыме Вера Горохова, Озаҥ федерал университетын студенткыже, шукерте огыл Озаҥыште эртыше КВН-ын «Республика» лигыжын полуфиналыштыже модшо Марий Эл гыч командын участницыже Анна Якаева.
Команде-влак денат палдарыман, очыни. Конкурсын кум туржымат эртымеке, сеҥышыш Йошкар-Ола гыч «ЛУ-КА» команде лектын. «Ончыко» журналын тӱҥ редакторжо Игорь Попов командышкыже путырак мыскараче ӱдыр-рвезе-влакым чумырен. Икмынярже ты предприятийыштак ыштат, весышт вузышто тунемыт, моло сферыште тыршат. Игорь – икымше ий огыл марий КВН-ын участникше, сандене ты модышым угыч эртараш тӱҥалмылан Марий тӱвыра рӱдерлан, вӱдышӧ Сергей Карповлан тауштыш.
Конкурсын условийже почеш ончыч команде-влак шкешт дене палдареныт, вара икте-весыштлан кум йодышым пуэныт да вашештеныт. Тыште мыскарам ыштен да тудым умылен, писын оҥай вашмутым шонен муын моштымышт вигак шижалтын. «Манеш-манеш» студент командымат мокталтыман: самырык уш писе, чоҥештылаш ямде улшо. Модышыш пытартышлан ушненыт гынат, ямдылалт шуктеныт.
«Кечан-кече» командын ныл участникше веле лийын, но макым пуэн огытыл. Нунын деке эше школышто тунемше участникын ушнымыжымат мокталтыман.
Пытартыш турышто команде-влаклан «Муно чывым туныкта» мӧҥгысӧ пашам ончыкташышт логалын. Мишкан гыч толшо рвезе ӱдыр-влак поснак куандарышт: презентацийыштын сюжет линийышт, чиемышт, койшышт денат. Капитан гармоньымат шоктен мурыш, ӱдыр-влак кушталтыштат. Эсогыл Йошкар-Олаш кузе толын шумышт нергенат пеш веселан каласкалышт. Жюрин модышым иктешлымыже жапыште Алексей Ибулаев Мишкан гыч кондымо муро пӧлекше денат сийлыш.
КВН-ыште кокымшо верыш лачшымак Мишкан гыч толшо уна-влак лектыч. Кумшо ден нылымше «Манеш-манеш» ден «Кечан кече» команде-влак лийыч.
Конкурс мучашлалте гынат, участник-влак каяш вашкен огытыл. Ончычсо КВН модыш-влак кузе эртымым шарналтеныт, вес гана кушто вашлийын кертме нерген каҥашеныт да шарнашлан войзалтыныт.
Светлана Носова
Снимкыште: марий КВН годым.
Р.Николаеван фотожо
