3 декабрьыште Йошкар-Олаште тӱнямбал кӱкшытан «Новое в культуре» форум почылтеш.
Тудо кум кече шуйна. Ты гана мероприятий-влак Я.Эшпай лӱмеш Марий кугыжаныш филармонийыште, Т.Евсеев лӱмеш национальный тоштерыште, Национальный художественный галерейыште, С.Г.Чавайн лӱмеш национальный книгагудышто да «Башня» тӱвыра да выставке рӱдерыште эртаралтыт.
Форумын темыже тений самырык-влак дене у семын пашам ыштымылан пӧлеклалтын. Тиде жапыште Марий Элыште «Пушкин карт» программын пашажым иктешлат да ончыкыжым самырык тукымым тоштерыш, театрыш, библиотекыш кумылаҥдыме шотышто эксперт-влак мутланаш тӱҥалыт.
Чылаже шым секций лиеш. Площадкылаш тӱвыра, науко, образований, туризм, информационный технологий, бизнес-тӱшка алан гыч 30 утла специалистым ӱжмӧ.
Форум жапыште «йыргешке ӱстел» йыр мутланымаш, шымлымаш ден пӱсӧ йодышлам тарватыше проект-влакын презентацийышт да молат лийыт.
Кугу форум 5 декабрь марте эрта.
А.БАЙКОВА
