Тиде кечылаште мылам Татарстан ден Чуваш республиклаште лияш пиал шыргыжале. Юл эҥерын пурла тура серышкыже шукертсекак миен толнем ыле, шонымашем шукталте.
Лач пурла серысе Шоло курык (рушлаже Вязовские горы маныт) гыч Юл вӱд путырак кумдан да моторын коеш. А ты курык кумдыкшо – Козловка ола гыч Свияжск эҥер марте, сандене Волжск, Зеленодольск олалам сайын ужаш лиеш. Волжскшо шола могырышто верланен, а Зеленодольск – пурлаште. Умбакыже – Романовский кӱртньӧ кӱвар. Тудыжым Николай II кугыжа годым 1909 ийыште чоҥаш тӱҥалме да 1913 ийыште пытарыме.
Юл вӱдыштӧ барже, теплоход-шамыч ийыт. Пурла серыштак часамлам вераҥдыме. Ты курык гыч парапланер дене чоҥештылыт, парашют дене тӧрштат, сандене тышке эреак калык погына. Тачат тыгак, молан манаш гын игечыжат сай.
Мый Озаҥысе парапланерист-влакын «Латкуд пыл» клубыштын еҥыштын чонештымыштым куанен эскерышым. Клубшо молан тыге маналтеш? Спорт мастерлан нормативым темаш манын, парапланер дене 16 гана 1500 метр кӱкшытыш нӧлталтын чоҥешташ кӱлеш. Клубым Алексей Старостин чумырен, а умбакыже тудын пашажым Александр Кобяков шуя. Кызыт тушко чылаже 80 еҥ коштеш.
Каласыман, Юл гыч виян мардеж лач тиде пурла серыш «пера», парапланерист-влак тидым вучат веле – икте почеш весе, кайык семын шулдырыштым шарен, южыш чоҥештен каят да варажым курыкышкак волен шинчыт.
Икмыняр еҥын волымекыже, нунын деч «Лӱдыкшӧ огыл?» йодымат, чыланат воштылыт веле. Ик ӱдыр «Теве ужыда, шеҥгелнына запасной парашют уло» мане.
А канде каваште пыл-шамыч «озаланат», пуйто шкеж деке ӱжыт. Айдеме южышто чоҥештылеш да умбакыжат тидым ышташ тӱҥалеш, но пӱртӱсым сеҥаш огеш лий. Кеч тушто, кумда каваште, вер чылалан сита гынат…
М.СКОБЕЛЕВ
Авторын фотожо