«Пушкин карт» 14 гыч 22 ияш ӱдыр-рвезе-влаклан тӱрлӧ культур учрежденийыште лияш йӧным ышта. Кугыжаныш полыш дене самырык-влак 1 сентябрь гыч пайдаланаш тӱҥалыныт.
Тыгай карт дене Йошкар-Оласе художественный училищыште тунемше-влак Анастасия Шаргина ден Дарья Молчановат пайдаланат.
– Кеч-могай пашам тӱҥалаш вдохновений манме кӱлеш. Тиддеч посна сӱретчын, ик радынажат огеш шоч. У пашалан кумылем пӱртӱсыштӧ коштмеке, музыкым колыштмеке, куштымеке, тӱрлӧ книгам, журналым лудмеке, путешествийыш миен толмеке але еҥын радынажым ончымеке, лектеш. Искусствын чыла йыжыҥже икте-весыж дене чак кылдалтын, нуно икте-весыштым умылаш, ала-мом уым, каласен моштыдымым, юзо шӱлышаным ышташ полшат. Адакшым кажне еҥлан культурно кушман, – чонжым почеш Анастасия. – А ме, художественный училищын студентше-влак, чыла гаяк тӱвыра мероприятийыш кошташ тыршена. Мутлан, пытартыш гана тоштерласе выставкыште, Эрик Сапаев лӱмеш опер да балет, Шкетан лӱмеш Марий кугыжаныш драме театрлаште, чапланыше художник-влакын мастер-классыштышт лийынна. Кажныже оҥайын да пайдалын эртен. Йӧра кеч «Пушкин карт» илышыш шыҥдаралтын, уке гын, культур учрежденийлаш кошташ тынарр шийвундым ситарыман веле ыле.
«Пушкин картын» озаже лияш нимо йӧсыжат уке, – палемдыш Д.Молчанова. – Тидлан теве мом ыштыман:
– «Госуслуги» сайтыште регистрироватлалтман («учётный запись» манмым ыштыман);
– Тидын деч вара гаджетыш «Госуслуги. Культура» мобильный приложенийым кусарыман;
– Тудын полшымыж дене виртуальный «Пушкин картым» ыштыман. А кӧн смартфонжо уке але интернет дене пайдаланыме годым иктаж нелылык лектеш гын, тыгай картым «Почта Банкын» кеч-могай отделенийыштыже ышташ лиеш.
Чынжымак, «Пушкин картым» нимогай нелылык деч посна ышташ лиеш, сандене тудын дене чылан пайдаланен кертыт.
Ушештарена, картыште кугыжанышын ойырымо 3 тӱжем теҥгежым У ий марте кучылт шуктыман, уке гын, тудо арам йомеш. А 2022 ий январь гыч картыште вич тӱжем теҥге лиеш. Марий Элыште «Пушкин картын» участникше-влакын спискыштым тиде ссылке дене ончыман: https://mincult12.ru/node/12672
А.Байкова
Фотом ӱдыр-влакын еш альбомышт гыч налме