Йошкар-Олан усталык коллективын «Триколор – наследие победы» концерт программыже кум ужашан лийын.
Икымшыже – «Россий таче. СВО» – спецопераций дене кылдалтын. Чынжымак, Кугу Отечественный сар пытымеке, элыштына эше иктаж гана сар лиеш манын кӧ шонен? Иктат! Чаманаш гына кодеш, мемнан салтакна-влак спецоперацийыште элнам аралат, тушман ваштареш кредалмаште лӱддымылыкым, патырлыкым да виян улмыштым ончыктат. Сӧй пасуэш вуйыштым пыштыше-влак коклаште марий салтак-шамычат ятырын улыт. Туге гынат элыштына илыше-влак, пырля лийын, сеҥымашым лишемдаш полшат. Тидым «Сильные духом» ансамбльын («Геройын пелашыже. Геройын аваже. Марий Эл» проект) «Нас миллионы русских» мурым йоҥгалтарымыж дене пеҥгыдемдыш.
«Тӱня, йоча-влак, Шочмо эл» ужашыште кажне йоча пиалан лийшаш да тыныс илышлан куанышаш манме шонымаш ушыш шыҥдаралте. Кугу Отечественный сар пагытын кочо илышыже, тылыште тыршыше-влакын сеҥымашым лишемдаш полшымышт кумшо ужашыште муро да куштымашла гоч почылтыч.
Ты программым ойыртемалтшын чоҥымо, кован («В старом доме» театр-студийын режиссёржо Татьяна Васильева) уныкажлан (Йошкар-Оласе 7-ше №-ан школ пеленысе «Антракт» театр студийын участникше) элнан эртен толмо корныж дене палдарымыже залыште шинчыше-влакланат пайдале лийын.
А.БАЙКОВА
М.Скобелевын фотожо
