Марий Эл радио шкенжын 18 ияш шочмо кечыжым кугу кеҥеж концерт дене палемдыш.
Тудо «Дружба» стадионышто эртыш. Тушко 5 тӱжем наре еҥ толын, тыге сцене гыч йоҥгалте. Радиовӱдышо, эстраде артист-влак дене пырля муреныт, куштеныт, кумылым вӱчкеныт. Кум ий тыгай концерт эртаралтын огыл, сандене тудо вучымак лийын. А кузе калыкна Марий Эл радиом йӧрата, возашыжат огеш кӱл, очыни. Тудым мемнан республикыште веле огыл, Российын тӱрлӧ лукыштыжат, йот эллаштат, эсогыл Америкыште, Италийыште, Нидерландыште, Финляндийыште, Эстонийыште, Литваште да моло вереат колыштыт. Шукыштын тудо суртыштышт йӱдшӧ- кечыже йоҥга, сандене лишыл йолташ семын радио эре пырля, манаш лиеш. Поснак йот элыште илыше-шамычлан, шочмо вер дене кылым кучаш, тушто мом лийым пален налаш да тӱҥжӧ марий йылмым шарнаш полша.
Концертыште мый ик ӱдырамаш дене палыме лийым. Маргарита Третьякова Медведево велне шочын-кушкын, 40 ий наре Москошто ила да пашам ышта. Ончычрак канаш тӱрлӧ верыш коштын гын, кызыт лачшымак Марий кундемыш гына кажне ийын толеш. «Тысе санаторий-влак нимо денат уда огытыл, минерал вӱд, лавыра – чыла шкенан уло. Пӱртӱснажак мом шога! Яндар юж, чодыра, шуко ер… Тышке толын, марий шӱлышан мероприятийлаш кошташ йӧн уло. Марий Эл радион эртарыме чыла кеҥежымсе концертыштыже лийынам. Тушто тыгай кумылым нӧлтышӧ шӱлышым налам, чонем кана да юарла», – мане тудо.
Чонжо концертыш толшо кажне еҥын юарлен, очыни. Шукышт тӱҥалтыш гыч мучаш марте мурен-куштен шогеныт, эсогыл шке шинчыме верыштыштат. Маргарита гын «молан кушташ огыда лек?» манын йодмемлан тыге каласыш: «Кушташ лектам гын, концертыште мо лиймым ужын ом шукто. Мый кажне татшым шарнен коднем».
18 ий жапыште Марий Эл радион кеҥежымсе концертше марий калыкнан ик эн йӧратыме йӱла пайремышкыже савырнен манашат лиеш. Чыланат, ончылгоч билетым налын, ямдылалтын толыт. Эсогыл тоям тоялен толшо илалше кувавайымат ужым. Тиде огыл мо йӧратымаш нерген ойла? Эшежым радио пашаеҥ-влак нунылан шуко пӧлекым ямдыленыт ыле. Пӧлек шотеш спонсор, партнёр-влакын полшымышт дене кондиционерым, турпутёвкылан, массажлан сертификат-влакым, тӱрлӧ кочкыш сату йӧрварым монь кучыктеныт. Эсогыл велосипед дене мӧҥгыш кайышат лийын. Тудым Морко район Шиньшаште шочын-кушшо, кызыт Озаҥыште илыше Валентина Степанова модын налын. Вучыдымо пӧлеклан тудо моткоч куанен ыле. «Эргымлан пӧлек лиеш», – мане.
Ныл шагаташ концерт-шоун программыжат поян лийын. Марий Эл радиошто идалык мучко йоҥгалтше муро-влакым колыштмо. Южо номерже чылт хитыш савырненыт манаш лиеш. Налаш Сергей Пакеевын «Студент» мурыжымак. Кеч ты артистым гармоньжо деч посна сценыште ужмат огылла чучеш. Ончыч радиовӱдышылан ыштыше, а кызыт Таджикистаныште контракт почеш службым эртыше да отпускыш толшо Вадим Протасовымат сценыште гитарым шоктен мурымыжым колышташ куанле лийын. Мурызо Мая Ахметзяновамат палемдыман, радиовӱдышӧ-влакын ойлымышт почеш, тений гына 30 наре мурым намиен. Иктыжым сцене гыч йоҥгалтарыш. «Южгунам муралтыме шуэш, южгунам кушталтыме шуэш» манме шомакшым ончышо-влакат пырля муреныт. Аделина Батаева «Йӱштывӱдым йӱмем шуэш помидор кочмем годым» калык мурылан у шӱлышым пуэн, у семын йоҥгалтарыш. Шукерте огыл илыш гыч кайыше мурызо да радивӱдышӧ Раисия Данилован оҥгалтарыме «Илаш кӱлеш» мурыжымат колна. Тудлан у шӱлышым Светлана Яндукова пуэн. Шернур кундем гыч Саша Иванов кум иза-шольо Шабдаровмыт дене пырля сценыште выступатлышт. Эрге-влакын кушкын толмыштлан, усталыкыштым пойдарымылан куанаш гына кодеш. Теве гына изи улыт ыле, качымарийышкат савырненыт.
Шарнымашеш кодеш мурызо да радивӱдышӧ, поэтессе Татьяна Соловьёван «Пӧртыл» у мурыж дене сценыш лекмыже. Кызыт шуко марий ӱдрамаш шке пелашыштын сӧй гыч пӧртылмыштым вучат. Тудын мурыжо нунын чоныш мыняр-гынат волгыдо ӱшаным пурта. Тек кажне салтак илыше да таза пӧртылеш. Мурен пытарымекыже, СВО гыч отпускыш толшо Альберт пелашыже, пеледышым кучен, Алина ӱдырышт дене пырля сценыш кӱзышт, ӧндалалтыч. Тыгайым ужат да шинчавӱд вигак лектеш…
Концертыште шуко мотор дуэт-влак мурым йонгалтарышт. Евгений Иванов ден Виктория Мочаловам гын онченак куанышым. Южо лӱмлӧ мурызыжын у мурыштымат колмо шуэш ыле, конешне. Но калыкын йӧратыме мурышкышт савырныше сем-влак садак кумылым налыт.
Икманаш, Марий Эл радион пашаеҥже-влак ончаш толшо калыклан куаным кондышо кугу пайремым пӧлеклен кертыч. Иктым гына вес ганалан шотыш налман, очыни, концертыш билетым верым ончыктыманымак ужалыман. Уке гын, южышт ончылгоч ик радам дене верым айлен шинчыт. А весышт верым кычал коштыт. Пайремыш толмо гын, шкем пагалымашат ӱлыкӧ волшаш огыл.
Светлана Носова
И.Речкинын фотожо
